Тошкент ҳамда Самарқанд вилоятида эҳтиётсизлик натижасида қудуққа тушиб кетган фуқаролар қутқариб олинди, дея хабар қилмоқда ФВВ.
Қайд этилишича, 6 февраль куни Тошкент вилояти Фавқулодда вазиятлар бошқармасига Тошкент тумани Собир Раҳимов жамоа хўжалиги, Шерматов кўчаси, 62-уйда истиқомат қилувчи фуқаро Қ.Б.нинг қудуқ ичига тушиб кетганлиги тўғрисида хабар келиб тушган.
Аниқланишича, ҳодиса Чирчиқ шаҳрида жойлашган «Фахрий Барака Сервис» боғдорчилик—узумчилик ширкатига қарашли 18-дала ҳовлида фуқаро қудуқдан сув чиқариш мақсадида, унга тушаётган вақтида оёғи сирпаниб кетганлиги туфайли содир бўлган. Оқибатда унинг оёғи синиб, юқорига қайтиб чиқа олмаган.
Мурожаат юзасидан қутқарувчилар зудлик билан воқеа жойига етиб борган. Олиб борилган тезкор ҳаракатлар натижасида фуқаро Қ.Б. қудуқ ичидан олиб чиқилиб, тез-тиббий ёрдам хизматига топширилган.
Бундан ташқари, 16 февраль куни тунда Самарқанд шаҳри Бобур Мирзо кўчасидаги уйларнинг бирида истиқомат қилувчи фуқаро Фавқулодда вазиятлар вазирлигининг вилоят бошқармаси навбатчилик қисмига уни чуқурликдан чиқариб олишларини сўраб мурожаат қилган.
Лейтенант Н.Каримов бошчилигидаги қутқарув гуруҳи зудлик билан белгиланган манзилга етиб бориб, беш дақиқа ичида уй эгасини чуқурдан олиб чиққан.
Маълум бўлишича, фуқаро Р.С. тунда, ҳовлида юрган вақтида бир кун олдин ўзи қазиб қўйган чуқурликка тушиб кетган. Таъкидланишича, уй эгаси жиддий жароҳатлар олмаган.
Бундан аввал Бўзсув каналида оқиб кетаётган одам, Жиззахда чуқурлиги 19 метр бўлган қудуққа тушиб кетган 69 ёшли аёл ҳамда Андижонда дарё оқизиб кетган икки шахс қутқариб олингани ҳақида хабар берилганди.
Изоҳ (0)