AQShda SARS-CoV-2 virusining ikkita shtamm birlashishi natijasida hosil bo‘lgan gibrid turi aniqlandi, deya xabar bermoqda Daily Mail.
Virusning yangi turi Nyu-Meksiko shtatida joylashgan AQShning Los-Alamos milliy laboratoriyasining doktori Bett Korber tomonidan kashf etildi. Uning ta’kidlashicha, gibrid — “britancha” B.1.1.7 va “amerikacha” B.1.429 shtammning birlashuvidan kelib chiqqan.
Hozircha mutaxassislar virusning gibrid turi bilan kasallangan birgina holatdan xabardor, bundan tashqari, yangi turdagi yuqumli kasallik haqida ma’lumot yo‘q, ammo bu virus bilan kasallangan bemorlar ko‘proq bo‘lishi mumkin.
Mutaxassislarning fikricha, yangi tur, aftidan, “rekombinatsiya hodisasi”, ya’ni virus yuqishi paytida aloqada bo‘lgan viruslar o‘rtasida genlar almashinuvi natijasida paydo bo‘lgan.
Qayd etilishicha, ilgari gibrid viruslarning paydo bo‘lishi haqida xavotirlar bo‘lgan, ammo mutaxassislar buning iloji yo‘q, deb hisoblagan, chunki buning uchun alohida shartlar talab etiladi. Odam bir vaqtning o‘zida ikkita shtamm bilan turli tashuvchilar orqali kasallanishi mumkin, xolos. SARS-CoV-2 virusining dominant variantlari deyarli barcha hududlarda ustun bo‘lganligi sababli ba’zi olimlar bir vaqtning o‘zida ikkita shtamm bilan kasallanish ehtimoli juda kam deb hisoblaydi.
Ta’kidlanishicha, agar yangi virusning kelib chiqishi tasdiqlansa, u COVID-19 pandemiyasi paytida aniqlangan birinchi gibrid shtammga aylanadi.
Bundan avval Britaniyada koronavirusning “xavotirliroq” turi aniqlangani, dunyo bo‘yicha koronavirusning tarqalish sur’ati bir oy davomida deyarli ikki barobarga kamaygani hamda Braziliyada bir vaqtning o‘zida koronavirusning ikkita shtammini yuqtirib olish holatlari aniqlangani haqida xabar berilgandi.
Izoh (0)