Mercedes-Benz firmasi 50 millioninchi avtomobilini ishlab chiqarganini nishonladi. Hayratlanarli raqamlarga nemis markasining 95 yilligi arafasida erishishga muvaffaq bo‘lingan. Tartib raqami 50 000 000 bo‘lgan ikki xil rangli Mercedes-Maybach S 580 limuzini Zindelfingendagi zavod konveyeridan chiqqan, deb xabar beradi Motor.
Mercedes-Benz ishlab chiqarilayotgan avtomobillari hisobini 1946-yildan buyon yuritib kelmoqda, ya’ni 50 millioninchi avtomobil marrasiga kompaniya 75 yilda erishgan. Mercedes-Benz boshqaruv kengashi a’zosi Yorg Burzer ushbu yubileyni “mutlaqo jamoaning yutug‘i” va “kompaniya tarixidagi muhim davr”ligini ta’kidlagan.
50 millioninchi avtomobil — benzinda harakatlanadigan Mercedes-Maybach hashamatli limuzini ekanligi e’tiborga molik, ushbu Factory 56 fabrikasida joriy yildan Mercedes-Benz EQS elektrokarini ishlab chiqarish ham boshlanadi. Nemis firmasi 2022-yilga qadar “batareyali” Mercedes-Benz EQ lineykasini oltita modelga qadar oshirishni rejalashtirgan. Ayni vaqtda uchta elektrokar nomi ma’lum — EQA va EQC krossoverlari, shuningdek, EQV miniveni.
Eslatib o‘tamiz, 2020-yilning dekabrida Mercedes-Benz G-Class’ning 400 minginchi nusxasi ishlab chiqarilgani e’lon qilingandi.
Izoh (0)