Namangan viloyatida ikki kishini soxta hujjatlar bilan Rossiyaga yubormoqchi bo‘lgan shaxslar qo‘lga olindi, deya “Daryo”ga xabar bermoqda Bosh prokuratura.
Qayd etilishicha, Bosh prokuratura huzuridagi Departament hamda DXX tomonidan Namangan viloyatida o‘tkazilgan tezkor tadbirda fuqarolar N.X. va A.A. pandemiya davrida Rossiyaga kirish taqiqlanganligidan foydalanib, ushbu davlatga ketish istagida bo‘lgan ikki nafar fuqaroning ishonchiga kirgan.
Ularga davolanish uchun soxta taklifnoma asosida Rossiyaga chiqarib yuborish evaziga 1000 AQSh dollari va 5,2 million so‘mni olib, qalbaki hujjatlarni bergan vaqtida ashyoviy dalil bilan ushlangan.
Mazkur holat yuzasidan Jinoyat kodeksining 168 (firibgarlik) va 228-moddalari (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qo‘zg‘atilib, tergov harakatlari o‘tkazilmoqda.
Bundan avval Surxondaryoda jiyani nomiga 4,5 sotix yerni auksionsiz ajratib, uni 180 million so‘mga sotmoqchi bo‘lgan tuman qurilish bo‘limi boshlig‘i, Farg‘onada 8 gektar yer olishda yordam berish evaziga 8 ming dollar olgan sobiq kadastr xodimi hamda Qashqadaryoda o‘qishga kiritib qo‘yishni va’da qilib, 22 kishini 22,5 ming dollarga chuv tushirgan firibgarlar qo‘lga olingani haqida xabar berildi.
Izoh (0)