Коррупцияга қарши курашиш агентлиги 2021 йилнинг январь ойида давлат харидлари соҳасида «Коррупциясиз соҳа» лойиҳаси доирасида амалга оширилган ишларига оид ҳисоботи билан бўлишди.
Эслатиб ўтамиз, 6—11 январь кунлари Навоий вилоят ҳокимлиги «Ягона буюртмачи хизмати» инжиниринг компанияси мансабдорларига тегишли деб гумон қилинган қурилиш соҳасидаги тадбиркорлик субъектлари томонидан давлат буюртмалари қонун талабларига зид равишда қўлга киритилгани ҳақидаги хабарлар берилганди.
Ўрганишлар жараёнида Навоий вилоят ҳокимлиги «Ягона буюртмачи хизмати» инжиниринг компанияси мансабдор шахслари томонидан манфаатлар тўқнашувига йўл қўйган ҳолда Navoiy Tears Invest МЧЖ билан қиймати 38 миллиард сўмлик жами 11 та қурилиш объектлари бўйича шартномалар тузилгани аниқланган. Ўрганишлар давомида жами 1,588 миллиард сўмлик молиявий хато ва камчиликларга йўл қўйилгани маълум бўлган.
Шу каби ҳолат, Навоий вилоят ҳокимлиги «Ягона буюртмачи хизмати» инжиниринг компанияси томонидан «Мехрангез Б-2002» МЧЖ билан қиймати 4,7 миллиард сўмлик 2 та қурилиш объектлари бўйича шартномалар тузилганлиги аниқланган. Ўрганишлар давомида жами 58,7 миллион сўмлик хато ва камчиликлар аниқланган.
Шунингдек, Коррупцияга қарши курашиш агентлиги томонидан Андижон вилоят ҳокимлиги «Ягона буюртмачи хизмати» инжиниринг компанияси, «Қишлоқ қурилиш инвест» МЧЖ ИК Андижон вилоят филиали, Андижон вилояти қурилиш бош бошқармаси мансабдор шахсларига тегишли қурилиш корхоналари томонидан давлат буюртмалари қонун талабларига зид равишда қўлга киритилганлиги ҳолатлари юзасидан Ҳисоб палатаси ва бошқа вазирлик ҳамда идоралар билан ҳамкорликда ишчи гуруҳ тузилган ҳолда ўрганишлар олиб борилмоқда.
Ўрганишлар жараёнида Андижон вилоят ҳокимлиги «Ягона буюртмачи хизмати» инжиниринг компанияси буюртмаси асосида шартнома қиймати 139,7 миллиард сўмлик 17 та, «Қишлоқ қурилиш инвест» МЧЖ ИК Андижон вилоят филиали буюртмаси асосида 3,2 миллиард сўмлик 1 та қурилиш объектлари қамраб олинган.
Маълум бўлишича, Андижон вилояти «Ягона буюртмачи хизмати» инжиниринг компанияси буюртмачилигида 2019—2020 йилларда жами 541 та объектларда 480,4 миллиард сўм, шундан 2019 йилда 321 та объектларда 287 миллиард сўм ҳамда 2020 йилда 220 та объектларда 196,4 миллиард сўм республика ва маҳаллий бюджет маблағлари ҳисобидан қурилиш-монтаж ишлари олиб борилган.
Агентлик ходимлари томонидан ўрганилганда, Андижон вилояти «Ягона буюртмачи хизмати» инжиниринг компанияси буюртмачилигида 2019—2020 йиллар давомида 6 та қурилиш жамиятлари томонидан жами 53 та объектларда 171,5 миллиард сўмлик (умумий қийматга нисбатан 35 фоизни ташкил этади) тендер (танлов) савдолари қўлга киритилгани маълум бўлган.
Ўрганишда қурилиш объектларига нисбатан ўтказилган тендер (танлов)ларда манфаатлар тўқнашувига йўл қўйилганлиги, одоб-ахлоқ қоидалари қўпол равишда бузилганлиги, тендер жараёнини ўтказиш ва тегишли ҳужжатларни расмийлаштиришда қатор қонунбузилиши ҳолатларига йўл қўйилганлиги аниқланган.
Жумладан, Андижон вилояти «Ягона буюртмачи хизмати» инжиниринг компанияси директори М.Қ., директор ўринбосари М.К., Қурилиш бош бошқармасининг бошлиғи Р.Х., «Қишлоқ қурилиш инвест» МЧЖ ИК Андижон вилоят филиали директори Р.Д. хизмат фаолиятини олиб боришда манфаатлар тўқнашувига йўл қўйиб, ўзи ёки яқин қариндошларига қарашли фирмаларни тендер (танлов)ларда қатнашишига йўл қўйган ва оқибатда ушбу фирмалар тендер (танлов)ларда ғолиб бўлган.
Шунингдек, «Жаҳон маъмур қурилиш» МЧЖ ва «Шаҳрихон қурилиш грант» МЧЖ қатнашган 7 та танлов ва тендерларда кафилланганлик ҳолатлари мавжуд.
Бундан ташқари, 18 та танлов ва тендерларни ўтказиш жараёнларида «Давлат харидлари тўғрисида»ги қонун ва бошқа қонуности норматив ҳужжатлар талаблари бузилган. Ёки айрим иштирокчи тадбиркорлар танлов ва тендерга корхонанинг молиявий натижалари тўғрисидаги, бухгалтерия баланси, ишчилар сони тўғрисидаги ҳисоботларни нотўғри топширган.
Ўрганилган 12 та қурилиш объектлари бўйича лойиҳа смета ҳужжатлари ишлаб чиқилишида қурилиш материаллари нархлари нотўғри қабул қилиниши натижасида қурилиш объектлари лойиҳаси қиймати 9,4 миллиард сўмга ортиб кетган.
Қурилиш соҳасида назорат инспекцияси томонидан ўтказилган ўрганишлар натижасида, Қўрғонтепа туманида жойлашган 2-сонли мактабгача таълим муассасасида 3,6 миллион сўм, Андижон вилояти Қўрғонтепа туманидаги 5-сонли умумтаълим мактабида 20,5 миллион сўм, Балиқчи туманидаги 35-сонли умумтаълим мактабида 2,9 миллион сўм, Шаҳрихон туманидаги тиббиёт бирлашмаси 2-сонли туғруқхона комплексида 30,9 миллион сўм, жами 4 та қурилиш объектларида 57,9 миллион сўм миқдорда сифатсиз ишлар амалга оширилгани маълум бўлган.
Барча 18 та қурилиш объектларининг 11 таси фойдаланишга топширилган бўлиб, дастлабки босқичда улардан 4 тасида назорат ўлчови ўтказилган.
Назорат ўлчови натижасида Қўрғонтепа туманида жойлашган 2-сонли мактабгача таълим муассасасида 335 миллион сўм, Балиқчи туманда жойлашган 35-сонли умумтаълим мактабида 354 миллион сўм, Қўрғонтепа туманидаги 5-сонли умумтаълим мактабида 408 миллион сўм, Шаҳрихон туманида жойлашган тиббиёт бирлашмаси 2-сонли туғруқхона комплексида 389 миллион сўм, жами 4 та қурилиш объектларида 1,486 миллиард сўмлик ишлар кам бажарилгани аниқланган.
Ўрганишлар давомида аниқланган юқоридаги ҳолатлар бўйича терговга қадар текширув ҳаракатлари ўтказиш лозимлигини инобатга олиниб, тўпланган ҳужжатлар Бош прокуратурага тақдим этилган. Ҳозирги кунда 4 та қурилиш объектлари бўйича айбдор шахсларга Жиноят кодексининг 167-моддаси (ўзлаштириш ёки растрата йўли билан талон-торож қилиш) 3-қисми ва 209-моддаси (мансаб сохтакорлиги) 1-қисми билан жиноят иши қўзғатилди ва ҳозирда тергов ҳаракатлари олиб борилмоқда.
Мавзуга доир:
Изоҳ (0)