Rossiyaning Vladikavkaz shahrida bugun, 12-fevral kuni ertalab supermarket portlab ketdi, deb xabar beradi “RIA Novosti”. Bino butunlay vayron bo‘ldi. Jabrlanganlar haqida hozircha to‘liq ma’lumot yo‘q.
Portlash supermarketda ish boshlanmasidan oldin, mahalliy vaqt bilan 7:24 da yuz bergan.
Ichki ishlar vazirligi xabarida aytilishicha, alohida joylashgan bino qulab tushgan, unda “Magnit” do‘koni joylashgan bo‘lgan. Politsiya va Favqulodda vaziyatlar vazirligi xodimlari voqea joyida ish olib bormoqda.
Dastlabki ma’lumotlarga ko‘ra, hodisaga gaz-havo aralashmasining sizib chiqishi sabab bo‘lgan: yerto‘lada kislorod ballonlari saqlangan. Yuzga yaqin odam xarobalarni tekshirib chiqmoqda, yaqin orada ularga yana yuz nafar qutqaruvchi kelib qo‘shiladi. Tergov qo‘mitasi tekshiruv boshladi.
“Qurbonlar haqida ma’lumot kelib tushgani yo‘q. U yerda bo‘lgan yagona odam — zargar kechasi bilan ishlagan, qandaydir shoshilinch buyurtmasi bo‘lgan. Tongga yaqin uxlab qolgan, portlashdan uyg‘onib ketib, vayronalardan chiqib olishga muvaffaq bo‘lgan”, — dedi Shimoliy Osetiya Respublikasi hukumat raisi o‘rinbosari Irbek Tomayev.
Voqea joyida olingan kadrlarda bino deyarli to‘liq vayron bo‘lganini ko‘rish mumkin. Unda bir nechta supermarket, mebel do‘koni, stomatologiya joylashgan edi. Ma’lumotlarga ko‘ra, bino uch qavatli bo‘lgan.
Izoh (0)