Farg‘onada o‘zgaga tegishli 44 mln so‘mlik 4 qop soch tortib olindi. Jinoyatchilar 5 yilgacha ozodlikdan mahrum etilishi mumkin

Farg‘onada to‘rt nafar fuqaro o‘zgaga tegishli to‘rt qop sochni o‘g‘irlab ketdi, deb xabar beradi viloyat IIB axborot xizmati.

“10-fevral kuni to‘rt nafar fuqaro bir guruh bo‘lib, Quva ko‘chasida joylashgan dala yer maydonida Q.Z. ismli ayolning oldiga kelishib, narxi 44,1 million so‘mlik to‘rtta qopga joylangan 70 kilogramm sochlarini ochiqdan ochiq tortib olib, hodisa joyidan yashiringan”, — deyiladi xabarda.

Mazkur holat yuzasidan Farg‘ona shahar IIO FMB huzuridagi tergov bo‘limi tomonidan Jinoyat kodeksining 166-moddasi 2-qismi “a” bandi (talonchilik) bilan jinoyat ishi qo‘zg‘atilib, tergov harakatlari olib borilmoqda.

Farg‘ona viloyat Ichki ishlar boshqarmasi yuqoridagi ko‘rsatilgan jinoyatni sodir etgan shaxslar besh yilgacha ozodlikdan mahrum qilish bilan jazolanishi mumkinligi haqida eslatib o‘tgan.

Avvalroq Toshkentda 35 yoshli erkakni kaltaklab, telefonini olib qo‘ygan uch nafar shaxs qo‘lga olingani, Marg‘ilonda o‘zidan bir yosh katta yigitning 4,1 million so‘mlik telefonini olib qo‘ygan 5 nafar voyaga yetmagan bolaga nisbatan jinoiy ish ochilgani to‘g‘risida xabar berilgandi.