O‘zbekiston Prezidenti Shavkat Mirziyoyev 8-fevral kuni Konstitutsiyaga o‘zgartirish kiritish to‘g‘risidagi qonunni imzoladi. Hujjat 6-yanvarda ma’qullangan edi, deb yozadi “Gazeta.uz”.
O‘zgartirish Konstitutsiyaning 107-modda 1-qismi — sud tizimiga taalluqli. O‘zgartirish kiritilayotgan moddada aniqlik kiritilishicha, O‘zbekiston sud tizimi Konstitutsiyaviy sud, Oliy sudi, harbiy sudlar, Qoraqalpog‘iston Respublikasi sudi, viloyatlar va Toshkent shahar sudlari, Qoraqalpog‘iston Respublikasi ma’muriy sudi, viloyatlar va Toshkent shahar ma’muriy sudlari, fuqarolik ishlari bo‘yicha tumanlararo, tuman, shahar sudlari, jinoyat ishlari bo‘yicha tuman, shahar sudlari, tumanlararo, tuman, shahar iqtisodiy sudlari va tumanlararo ma’muriy sudlardan iborat.
Ushbu o‘zgartirish O‘zbekiston Prezidentining 24-iyuldagi “Sudlar faoliyatini yanada takomillashtirish va odil sudlov samaradorligini oshirishga doir qo‘shimcha chora-tadbirlar to‘g‘risida”gi farmoniga ko‘ra kiritilayotgan bo‘lib, unga ko‘ra, 1-yanvardan boshlab sud tizimiga tegishli o‘zgartirishlar kiritilishi lozim.
Bundan tashqari, ma’muriy va boshqa ommaviy huquqiy munosabatlardan kelib chiqadigan ishlarni ko‘rishga ixtisoslashtirilgan Qoraqalpog‘iston Respublikasi, viloyatlar markazlari va Toshkent shahrida tumanlararo ma’muriy sudlarini tashkil etiladi, shu munosabat bilan tuman (shahar) ma’muriy sudlarini tugatiladi. Bunda Qoraqalpog‘iston Respublikasi, viloyatlar va Toshkent shahar ma’muriy sudlari saqlab qolinadi.
O‘zbekiston Konstitutsiyasining 107-moddasi 1-qismini quyidagi tahrirda bayon etish taklif etilmoqda:
“O‘zbekiston Respublikasida sud tizimi O‘zbekiston Respublikasi Konstitutsiyaviy sudi, O‘zbekiston Respublikasi Oliy sudi, harbiy sudlar, Qoraqalpog‘iston Respublikasi sudi, viloyatlar va Toshkent shahar sudlari, Qoraqalpog‘iston Respublikasi, viloyatlar va Toshkent shahar ma’muriy sudlari, fuqarolik ishlari bo‘yicha tumanlararo, tuman (shahar) sudlari, jinoyat ishlari bo‘yicha tuman (shahar) sudlari, tumanlararo, tuman (shahar) iqtisodiy sudlari va tumanlararo ma’muriy sudlaridan iborat”.
Shuningdek, o‘zgartirishga ko‘ra, endilikda Konstitutsiyada “zakonodatelstvo — qonunchilik”, “akt zakonodatelstva — qonunchilik hujjati”, “zakonodatelniy akt — qonun hujjati” ko‘rinishida beriladi.
Shu munosabat bilan davlat tilidagi Konstitutsiyaning 7-moddasi ikkinchi qismiga, 33-moddasiga, 85-modda to‘rtinchi qismi 8-bandiga, 86-modda beshinchi qismi 8-bandiga, 93-modda birinchi qismi 16-bandiga, 98-modda uchinchi qismiga, 100-modda sakkizinchi xatboshisiga, 117-modda sakkizinchi qismiga o‘zgartirishlar kiritildi.
Eslatib o‘tamiz, Senat ushbu qonunni 2020-yil 18-dekabr kuni o‘tkazilgan o‘zining so‘nggi yalpi majlisida ko‘rib chiqishi kerak edi, biroq internetda Konstitutsiyaga muvofiq (128-modda) parlament Konstitutsiyaga o‘zgartirish kiritish to‘g‘risidagi qonunni faqat keng jamoatchilik muhokamasidan so‘ng qabul qilishi mumkinligi to‘g‘risida maqolalar e’lon qilingach, masala kun tartibidan olib tashlangan edi.Senat raisi Tanzila Norboyeva “Konstitutsiya bizning bosh qomusimiz. Unga qo‘shimcha va o‘zgartirish kiritish xalqimiz bilan bemaslahat qilinmaydi. O‘zbekistonda hech bir narsa sirli emas. Hamma masala ochiq-oshkoralik bilan qabul qilinyapti, ko‘rib chiqilyapti, xalq bilan bamaslahat qilinyapti”, — deb aytgandi.
30-dekabr kuni O‘zbekiston Konstitutsiyasiga o‘zgartirishlar kiritish to‘g‘risida qonun Senat saytiga joylashtirildi. Hujjat Qonunchilik palatasi tomonidan 24-noyabrda qabul qilingan.
Izoh (0)