Eronning oliy rahnamosi Oyatulloh Xomanaiy AQSh va Buyuk Britaniyadan koronavirus vaksinalari importini taqiqladi

Eronning oliy rahbari Oyatulloh Ali Xomanaiy 8-yanvar kuni AQSh va Buyuk Britaniyada ishlab chiqarilgan COVID-19 vaksinalarini mamlakatga olib kirish taqiqlanganini ma’lum qildi, deya xabar bermoqda “Interfaks”.

“AQSh va Britaniyadan vaksinalarni mamlakatga olib kirish taqiqlandi. Men bu haqda rasmiylarga aytdim va hozir ommaviy ravishda e’lon qilyapman”, – dedi u Eron televideniyesida.

Uning so‘zlariga ko‘ra, agar Qo‘shma Shtatlar COVID-19’ga qarshi haqiqatan ham samarali vaksinani ixtiro qilgan bo‘lsa, ularga pandemiya bunchalik yomon ta’sir qilmagan bo‘lar edi.

Ma’lumot uchun, AQSh Pfizer/BioNTech va Moderna vaksinalarini qo‘llashni ma’qullagan. Buyuk Britaniya esa Pfizer/BioNTech hamda AstraZeneca vaksinalarni qo‘llashni ma’qullagan.

COVID-19 haqida gap ketganda Eron Yaqin Sharqdagi epidemiologik jihatdan eng noqulay mamlakat deb hisoblanadi.

Eronda pandemiya boshlanganidan beri 1,2 milliondan ortiq koronavirusga chalinish holatlari aniqlangan, bemorlarning 55,9 mingdan ortig‘i vafot etdi.

Eslatib o‘tamiz, dekabr oyi oxirida Eron odamlarda o‘zining koronavirusga qarshi vaksinasi bo‘yicha klinik sinovlarni boshlagandi.