Ўзбекистон Бандлик ва меҳнат муносабатлари вазирлигининг Давлат меҳнат инспекцияси 2020 йилда бандлик ва меҳнатни муҳофаза қилиш бўйича 2020 йил давомида 19 226 та корхонада 40 081 та қонун бузилиши ҳолатларини аниқлади. Бу ҳақда вазирлик матбуот хизмати хабар берди.
Уларни бартараф этиш бўйича 10 764 та ёзма кўрсатмалар ва 195 та тақдимномалар киритилган, 6 578 нафар мансабдор шахсларга нисбатан 11 миллиард 64 миллион сўмдан ортиқ маъмурий жарималар қўлланилган. 1 141 нафар фуқаронинг қарийб 3,6 миллиард сўм миқдордаги иш ҳақлари ундириб берилган.
Хабарда айтилишича, аниқланган қонун бузилишларидан 11 621 таси меҳнатни муҳофаза қилиш қонунчилиги ва техника хавфсизлиги қоидаларига амал қилмаслик, 2 915 таси меҳнат шартнома тузмасдан, норасмий равишда ходимлар меҳнатидан фойдаланиш, 4 301 таси иш ҳақини белгиланган муддатларда тўлаб бермаслик, 1 078 таси меҳнат дафтарчаларини юритиш тартибини бузиш, 1 517 таси ноқонуний ишдан бўшатишга оид. Шунингдек, 62 та мажбурий меҳнат ҳолатлари, 177 та ногиронлиги бўлган шахслар учун махсус иш ўринларини банд қилмаслик ва бошқа меҳнат ҳуқуқларини бузилиши ҳолатлари аниқланган.
Энг кўп қонун бузилишлари халқ таълими ва соғлиқни сақлаш тизимида аниқланган — 4 731 та ҳолатда халқ таълими тизимидаги ташкилот ва умумтаълим мактаблари мансабдор шахслари ўқитувчи ва бошқа ходимларининг меҳнат ҳуқуқларини бузган, 6 600 та ҳолатда қонун бузилишлари тиббиёт муассасаларида қайд этилган. Қолган қонун бузилиши ҳолатлари қурилиш соҳаси (1 397 та), саноат корхоналари (1 094 та), қишлоқ хўжалиги (986 та), олий ва ўрта махсус таълим муассасалари (667 та), транспорт соҳасига (509 та) тўғри келган.
Вазирликнинг маълум қилишича, фуқароларнинг кафолатланган меҳнат ҳуқуқларини таъминлаш ва мажбурий Бандлик ва меҳнат муносабатлари вазирлигининг доимий тарзда фаолият олиб борувчи, ўзининг шахсини ошкор қилмасдан маълумот бериш имкони бўлган ижтимоий тармоқда dmi.mehnat.uz сайти, қисқа рақамли 1176 ишонч телефони ва @mehnathuquqbot Telegram тармоғи ташкил этилган.
Изоҳ (0)