Oliy Majlis Qonunchilik palatasining 3-fevral kuni bo‘lib o‘tgan navbatdagi majlisida deputatlar voyaga yetmagan shaxslar manfaatlarini himoya qilish kafolatlarini yanada kuchaytirishga oid qonun loyihasini ko‘rib chiqdi. Shuningdek, qonun loyihasi bilan ularni majburiy mehnatga, taqiqlangan yoki g‘ayriqonuniy birlashmalar faoliyatiga jalb qilish hamda voyaga yetmaganlardan shahvoniy maqsadlarda foydalanish holatlariga chek qo‘yish va bunday harakatlarni sodir etganlarning javobgarligini so‘zsiz ta’minlash nazarda tutilgan.
Qonun loyihasi bilan Jinoyat, Jinoyat-protsessual kodekslariga hamda Ma’muriy javobgarlik to‘g‘risidagi kodeksiga o‘zgartish va qo‘shimchalar kiritilmoqda.
Ta’kidlanishicha, Jinoyat kodeksi o‘n olti yoshdan o‘n sakkiz yoshgacha bo‘lgan shaxsning o‘n sakkiz yoshga to‘lmaganligi aybdorga ayon bo‘lgan holda unga moddiy qimmatliklar berish yoki uni mulkiy manfaatdor etish orqali u bilan jinsiy aloqa qilish yoki jinsiy ehtiyojni g‘ayritabiiy usulda qondirish uchun javobgarlikni belgilaydigan modda bilan to‘ldirilmoqda.
Shu bilan birga, mazkur jinoyat obyekti sifatida o‘n sakkiz yoshga to‘lmagan shaxs normal va axloqiy rivojlanayotgani inobatga olinib, jinoyat subyekti yoshini 18 yoshdan belgilash taklif etilmoqda.
Bundan tashqari, Jinoyat kodeksiga voyaga yetmagan shaxsni mehnatga biron-bir shaklda ma’muriy tarzda majburlaganlik uchun to‘g‘ridan to‘g‘ri jinoiy javobgarlikni belgilovchi o‘zgartirish kiritilmoqda.
Deputatlarning fikricha, qonunning qabul qilinishi majburiy mehnatga to‘liq chek qo‘yilishiga, voyaga yetmagan shaxslarning manfaatlarini ta’minlashga, bu borada O‘zbekistonning xalqaro majburiyatlari bajarilishiga va shu tariqa mamlakatning turli baholash indekslaridagi reytingi ko‘tarilishiga xizmat qiladi.
Avvalroq voyaga yetmagan qizning nomusiga tegishda ayblangan xonanda Jasur Umirov 5 yilga qamalgani to‘g‘risida xabar berilgandi.
Izoh (0)