Олий Мажлис Қонунчилик палатасининг 3 февраль куни бўлиб ўтган навбатдаги мажлисида депутатлар вояга етмаган шахслар манфаатларини ҳимоя қилиш кафолатларини янада кучайтиришга оид қонун лойиҳасини кўриб чиқди. Шунингдек, қонун лойиҳаси билан уларни мажбурий меҳнатга, тақиқланган ёки ғайриқонуний бирлашмалар фаолиятига жалб қилиш ҳамда вояга етмаганлардан шаҳвоний мақсадларда фойдаланиш ҳолатларига чек қўйиш ва бундай ҳаракатларни содир этганларнинг жавобгарлигини сўзсиз таъминлаш назарда тутилган.
Қонун лойиҳаси билан Жиноят, Жиноят-процессуал кодексларига ҳамда Маъмурий жавобгарлик тўғрисидаги кодексига ўзгартиш ва қўшимчалар киритилмоқда.
Таъкидланишича, Жиноят кодекси ўн олти ёшдан ўн саккиз ёшгача бўлган шахснинг ўн саккиз ёшга тўлмаганлиги айбдорга аён бўлган ҳолда унга моддий қимматликлар бериш ёки уни мулкий манфаатдор этиш орқали у билан жинсий алоқа қилиш ёки жинсий эҳтиёжни ғайритабиий усулда қондириш учун жавобгарликни белгилайдиган модда билан тўлдирилмоқда.
Шу билан бирга, мазкур жиноят объекти сифатида ўн саккиз ёшга тўлмаган шахс нормал ва ахлоқий ривожланаётгани инобатга олиниб, жиноят субъекти ёшини 18 ёшдан белгилаш таклиф этилмоқда.
Бундан ташқари, Жиноят кодексига вояга етмаган шахсни меҳнатга бирон-бир шаклда маъмурий тарзда мажбурлаганлик учун тўғридан-тўғри жиноий жавобгарликни белгиловчи ўзгартириш киритилмоқда.
Депутатларнинг фикрича, қонуннинг қабул қилиниши мажбурий меҳнатга тўлиқ чек қўйилишига, вояга етмаган шахсларнинг манфаатларини таъминлашга, бу борада Ўзбекистоннинг халқаро мажбуриятлари бажарилишига ва шу тариқа мамлакатнинг турли баҳолаш индексларидаги рейтинги кўтарилишига хизмат қилади.
Аввалроқ вояга етмаган қизнинг номусига тегишда айбланган хонанда Жасур Умиров 5 йилга қамалгани тўғрисида хабар берилганди.
Изоҳ (0)