Buxoroda ijtimoiy tarmoqlar orqali o‘zgalarning ishonchini suiiste’mol qilib, plastik kartasidagi pullarini qo‘lga kiritgan shaxs qo‘lga olindi, deya xabar bermoqda “Daryo” muxbiri.
2020-yilning 19-dekabr kuni Shofirkon tumanidagi “Mahallaqozi” mahallasida yashovchi fuqaro J.A. Telegram ijtimoiy tarmog‘idagi “Omad Shou Aksiya” kanalining bonusli guruhiga odam qo‘shib, 200 ming so‘m pul yutib olganini ma’lum qilgan. Biroq ko‘p o‘tmay, plastik kartasidagi jami 1 million 105 ming so‘m miqdoridagi pullari yo‘qolganini bilgach, tuman ichki ishlar bo‘limiga murojaat qilgan.
Shofirkon tuman IIB tomonidan noma’lum shaxsga nisbatan Jinoyat kodeksining 168-moddasining 1-qismi (firibgarlik) bilan jinoyat ishi qo‘zg‘atilib, tezkor surishtiruv harakatlari olib borilgan. Bir yarim oy davomida olib borilgan surishtiruvlar natijasida ushbu jinoyatni Xorazm viloyatining Urganch shahrida yashovchi 1996-yilda tug‘ilgan T.M. sodir etgani aniqlangan. Firibgar 2021-yilning 31-yanvar kuni qo‘lga olingan.
“Fuqaro T.M. o‘zining ‘Omad Shou Aksiya’ Telegram guruhiga odamlarni qo‘shgan kishiga pul va’da berish orqali kam miqdordagi pul bilan siylab, oradan ko‘p o‘tmay J.A.ning plastik kartasiga tegishli Click maxfiy kodini olishga erishgan va uning mavjud barcha pullarni yechib olgan. Fuqarolarimizdan ijtimoiy tarmoqlar orqali e’lon qilinayotgan yutuqli o‘yinlar, turli xildagi aksiyalar, elektron savdolar va shunga o‘xshash bir qator firibgarlik va o‘g‘rilik holatlariga duchor bo‘lmasliklari uchun o‘zlarining plastik kartasi raqamlarini oshkor qilmasliklari yoki birovga bermasliklari, o‘zlariga notanish shaxslarning plastik kartalariga pul o‘tkazmalarini amalga oshirmasliklarini so‘rab qolar edik”, — deydi viloyat IIB axborot xizmati rahbari Shuhrat Jalolov.
Hozirda fuqaro T.M.ning yana bir nechta fuqarolarni aldaganlik holatini aniqlash yuzasidan qo‘shimcha tergov harakatlari davom ettirilmoqda.
Izoh (0)