Бухорода ижтимоий тармоқлар орқали ўзгаларнинг ишончини суиистеъмол қилиб, пластик картасидаги пулларини қўлга киритган шахс қўлга олинди, дея хабар бермоқда «Дарё» мухбири.
2020 йилнинг 19 декабрь куни Шофиркон туманидаги «Маҳаллақози» маҳалласида яшовчи фуқаро Ж.А. Telegram ижтимоий тармоғидаги «Омад Шоу Акция» каналининг бонусли гуруҳига одам қўшиб, 200 минг сўм пул ютиб олганини маълум қилган. Бироқ кўп ўтмай, пластик картасидаги жами 1 миллион 105 минг сўм миқдоридаги пуллари йўқолганини билгач, туман ички ишлар бўлимига мурожаат қилган.
Шофиркон туман ИИБ томонидан номаълум шахсга нисбатан Жиноят кодексининг 168-моддасининг 1-қисми (фирибгарлик) билан жиноят иши қўзғатилиб, тезкор суриштирув ҳаракатлари олиб борилган. Бир ярим ой давомида олиб борилган суриштирувлар натижасида ушбу жиноятни Хоразм вилоятининг Урганч шаҳрида яшовчи 1996 йилда туғилган Т.М. содир этгани аниқланган. Фирибгар 2021 йилнинг 31 январь куни қўлга олинган.
«Фуқаро Т.М. ўзининг ‘Омад Шоу Акция’ Telegram гуруҳига одамларни қўшган кишига пул ваъда бериш орқали кам миқдордаги пул билан сийлаб, орадан кўп ўтмай Ж.А.нинг пластик картасига тегишли Click махфий кодини олишга эришган ва унинг мавжуд барча пулларни ечиб олган. Фуқароларимиздан ижтимоий тармоқлар орқали эълон қилинаётган ютуқли ўйинлар, турли хилдаги акциялар, электрон савдолар ва шунга ўхшаш бир қатор фирибгарлик ва ўғрилик ҳолатларига дучор бўлмасликлари учун ўзларининг пластик картаси рақамларини ошкор қилмасликлари ёки бировга бермасликлари, ўзларига нотаниш шахсларнинг пластик карталарига пул ўтказмаларини амалга оширмасликларини сўраб қолар эдик», — дейди вилоят ИИБ ахборот хизмати раҳбари Шуҳрат Жалолов.
Ҳозирда фуқаро Т.М.нинг яна бир нечта фуқароларни алдаганлик ҳолатини аниқлаш юзасидан қўшимча тергов ҳаракатлари давом эттирилмоқда.
Изоҳ (0)