Futbol bo‘yicha Angliya Premyer Ligasining 22-turidan o‘rin olgan bir qator uchrashuvlar 2-fevral, seshanba kuni bo‘lib o‘tdi.
“Manchester Yunayted” jamoasi o‘z uyida “Sauthempton”ni qabul qildi. Mehmonlar ikkinchi daqiqadayoq bir o‘yinchi kam bo‘lib qoldi, bu esa Ole-Gunnar Sulsher shogirdlariga katta ustunlik berdi. Birinchi bo‘limning o‘zida mezbonlar raqib darvozasini javobsiz to‘rt marta ishg‘ol qildi. Aaron Uan-Bissaka, Markus Reshford va Edinson Kavani o‘z hisoblariga gol yozdirib qo‘ygan bo‘lsa, bitta avtogol qayd etildi.
Ikkinchi bo‘limda “qizil iblislar” yana besh marta raqib darvozasini ishg‘ol qildi. 69-daqiqada Antoni Marsyal jamoasining beshinchi golini urgan bo‘lsa, oradan ko‘p o‘tmay Skott Maktominey hisobni oshirdi. 86-daqiqada “avliyolar”ning ikkinchi o‘yinchisi qizil kartochka olib maydonni tark etdi. Qolgan vaqt mobaynida Brunu Fernandesh, Marsyal va Deniel Jeyms mezbonlarning gollariga muallif bo‘ldi.
Mazkur g‘alabadan keyin “Manchester Yunayted” ochkolarini 44 taga yetkazib oldi va ikkita zaxira o‘yiniga ega, peshqadam “Manchester Siti”ga yetib oldi.
Yana bir o‘yin “Vulverhempton” va “Arsenal” jamoalari o‘rtasida kechdi. Avvaliga londonliklar Nikolya Pepening goli evaziga oldinga o‘tib oldi. Birinchi bo‘lim yakunlanishi arafasida mehmonlar himoyachisi David Luiz o‘z jarima maydoni ichidagi qo‘pollik uchun to‘g‘ridan to‘g‘ri qizil kartochka olib maydonni tark etdi. Belgilangan penaltini Ruben Nevesh muvaffaqiyatli amalga oshirdi.
Ikkinchi bo‘lim debyutida Joau Moutinyu “bo‘rilar”ning ikkinchi golini urdi. 72-daqiqada “Arsenal” posboni Bernt Leno qizil kartochka olib maydonni tark etdi va shu hisob o‘yin yakuniga qadar saqlanib qoldi.
“Vulverhempton” 26 ochko bilan 14-pog‘onada bormoqda, “Arsenal” (31) esa 10-o‘rindan joy olgan.
APL
22-tur bahslari
2-fevral, seshanba
“Manchester Yunayted” — “Sauthempton” 9:0
Gollar: 1:0 – 18 Uan-Bissaka, 2:0 – 25 Reshford, 3:0 – 34, avtogol Bednarek, 4:0 – 39 Kavani, 5:0 – 69 Marsyal, 6:0 – 71 Maktominey, 7:0 – 87, penalti Brunu Fernandesh, 8:0 – 90 Marsyal, 9:0 – 90+3 Jeyms.“Manchester Yunayted”: De Xea, Shou (van de Bek, 46), Maguayr, Uan-Bissaka, Lindelyof, Brunu Fernandesh, Maktominey, Fred, Kavani (Marsyal, 46), Grinvud, Reshford (Jeyms, 60).
“Sauthempton”: Makkarti, Bertran, Stivens, Remzi, Bednarek, Yankevits, Jenepo (Tshaptshe, 78), Armstrong, Uord-Prouz, Ingz (Redmond, 70), Adams.
Ogohlantirishlar: Remzi (42), Stivens (45), Maguayr (52), van de Bek (53), Armstrong (89).
Chetlatishlar: Yankevits (2), Bednarek (86).
“Vulverhempton” — “Arsenal” 2:1
Gollar: 0:1 – 32 Pepe, 1:1 – 45+5, penalti Ruben Nevesh, 2:1 – 49 Moutinyu.“Vulverhempton”: Ruy Patrisiu, Semedu, Koudi, Boli, Kilmen, Podense (Vitinya, 62), Moutinyu, Netu, Ruben Nevesh (Dendonker, 74), Traore, Villian Joze (Fabiu Silva, 90).
“Arsenal”: Leno, Belyerin, Holding, Soaresh, David Luiz, Parti (Runarsson, 75), Saka, Smit-Rou, Jaka, Pepe (Obameyang, 61), Lyakazett (Gabriel, 46).
Ogohlantirishlar: Moutinyu (13), Kilmen (28), Parti (41), Ruben Nevesh (47), Jaka (62).
Chetlatishlar: David Luiz (45+3), Leno (72).
“Sheffild Yunayted” — “Vest Bromvich” 2:1
Gollar: 0:1 – 41 Fillips, 1:1 – 56 Bogl, 2:1 – 73 Sharp.Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)