Андижонда кадастр тизимида аниқланган 8 та коррупцион ҳолатнинг аксарияти собиқ ходимлар томонидан содир этилгани маълум қилинди

Андижон вилоятида сўнгги уч йил давомида кадастр соҳасига алоқадор 8 та коррупцион ҳолат аниқланган. Уларнинг аксарияти собиқ ходимлар томонидан содир этилган. Бу ҳақда Кадастр агентлигининг вилоят бошқармаси бошлиғи Фаёзиддин Бердиқулов маълум қилди, дея хабар бермоқда «Дарё» мухбири.

Таъкидланишича, Андижон шаҳридаги Digital City технопаркида ўтказилган матбуот анжуманида Кадастр агентлиги вилоят бошқармаси томонидан 2020 йилда бажарилган ишлар ҳамда 2021 йилдаги истиқболли режалар бўйича маълумот берилган.

Унда сўз олган Кадастр агентлигининг вилоят бошқармаси бошлиғи Фаёзиддин Бердиқулов бошқарма фаолияти, соҳага оид янгиликлар билан бирга ер ажратиш тизимида коррупцияга қарши курашиш борасида амалга оширилаётган ишлар ҳақида ҳам маълумот берган.

Қайд этилишича, сўнгги уч йил давомида вилоятнинг ўзида соҳага алоқадор 8 та коррупцион ҳолат аниқланган. Бундан ташқари, бошқарма томонидан ўтказилган назорат тадбирлари давомида қонун бузилиши ҳолатларига йўл қўйган 14 нафар ходимга нисбатан интизомий чора кўрилган.

«Аксарият юртдошларимиз ҳалигача ерни қандай тартибда ажратиш, кадастр ҳужжатларини расмийлаштириш жараёнлари бўйича билимга эга эмас. Бу эса турли коррупцион ҳолатларнинг содир бўлишига сабаб бўлмоқда. Ачинарлиси шундаки, аксарият коррупцион ҳолатлар кадастрнинг собиқ ходимлари томонидан амалга оширилган. Мисол учун, яқинда вилоят ‘Ермулккадастр’ давлат корхонасининг собиқ ходими М.Н. Андижон тумани ‘Айрилиш’ МФЙ ҳудудидаги саноат зонасидан 30 сотих ер майдонини кадастр ҳужжатлари билан расмийлаштириб беришни ваъда қилиб, эвазига фуқаро А.Қ.дан 15 минг доллар талаб қилиб, 5 минг долларини олаётган вақтида қўлга олинганлиги ҳақида хабар тарқалди. Ушбу ходим корхонамизга 2019 йил 27 майда ишга қабул қилинган. 2020 йил 25 июнь куни эса ички тартиб қоидаларини мунтазам бузганлиги сабабли Меҳнат кодекси 100-моддасининг 3-банди талаблари асосида у билан тузилган меҳнат шартномаси бекор қилинган. Собиқ ходим 6 ой илгари эгаллаб турган лавозимидан озод этилган бўлса-да, фирибгарлик билан шуғулланиб келаётганлиги сабабли тегишли ташкилотлар томонидан ушланди. Бундай ҳолатларни кўп мисол келтириш мумкин. Шу сабабли юртдошларимиздан фирибгарларнинг тузоғига илиниб қолмаслигини сўраб қоламиз», — деди Фаёзиддин Бердиқулов.