“Barselona” hujumchisi Lionel Messi klub bilan shartnomasini ommaga e’lon qilgan El Mundo nashri va bunga aloqasi bo‘lishi mumkin bo‘lganlarni sudga bermoqchi.
Argentinalik futbolchining advokatlari gazetani sudga beradi. Shuningdek, ular mazkur shartnomaning tafsilotlaridan xabardor bo‘lgan yana besh kishini ham javobgarlikka tortmoqchi.
Marca xabariga ko‘ra, ular qatorida katalonlar sobiq prezidenti Xosep Bartomeu, shartnomaning tuzilishi va imzolanishiga javobgar shaxs Oskar Grau, “Barselona” prezidentligi vazifasini vaqtincha bajaruvchi Karles Tuskets va yana ikki kishi bor.
Ma’lum bo‘lishicha, shartnomada uni maxfiyligini saqlash majburiyati haqidagi band bor va uning buzilishi Messini g‘azabga keltirgan.
Eslatib o‘tamiz, avvalroq El Mundo nashri Messi va jamoa o‘rtasidagi 2017-yilda tuzilgan ham 2021-yilning yozida o‘z nihoyasiga yetadigan shartnoma nusxasini qo‘lga kiritgandi. Shartnomaga ko‘ra, Messi hozirga qadar ushbu shartnoma tufayli 511 million yevro ishlab topgani va bu kelishuv unga umumiy miqdorda 555 million yevro keltirishi ma’lum bo‘lgandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)