Belarus bosh prokuraturasi mamlakatda noroziliklarning ramziga aylangan oq-qizil-oq rangli bayroqni ekstremistik deb tan olish uchun hujjatlar to‘plamini tayyorlamoqda. Bu haqda Meduza xabar qildi.
Ma’lum qilinishicha, bo‘limga 100 dan ortiq fuqarolardan “Buyuk Vatan urushi paytida Belarus zaminidagi shafqatsizlik ramzi bo‘lgan” oq-qizil-oq bayroqni tasniflash, ekstremistik ramz deb e’lon qilish va uni ommaviy namoyishlar uchun taqiqlash to‘g‘risida murojaatnoma kelib tushgan.
“Ekstremizmga qarshi kurashish to‘g‘risidagi qonun hujjatlarini takomillashtirish bo‘yicha ilgari Bosh prokuratura tomonidan olib borilgan ishlarni hisobga olgan holda, biz hozirda oq-qizil-oq rangdagi bayroq va boshqa ramzlarni ekstremistik deb tan olish to‘g‘risida hujjatlar to‘plamini tayyorlamoqdamiz”, — dedi Bosh prokuraturaning rasmiy vakili Anjelika Kurchak.
Hozir Belarusda oq-qizil-oq rangdagi bayroq ro‘yxatdan o‘tmagan belgi sifatida qayd etilgan. U ommaviy tadbirlarda ishlatilishi mumkin emas, lekin rasmiy ravishda taqiqlanmagan.
Eslatib o‘tamiz, 2020-yil 9-avgustda bo‘lib o‘tgan prezidentlik saylovlaridan so‘ng Belarusda norozilik namoyishlari boshlandi. Namoyish ishtirokchilari oq-qizil-oq rangdagi bayroqdan keng foydalanishni boshladi. Bayroqni binolarga va inshoot tomlariga ilib qo‘ydi.
Keyinchalik bayroqlar (hatto oq-qizil-oq rangdagi kiyimlar ham) olib qo‘yildi. Bayroqlarni derazalarga yoki balkonlarga osib qo‘ygan odamlarni ruxsatsiz namoyish o‘tkazishda ayblab, jarima va bir sutkalik qamoq tayinlandi.
Aleksandr Lukashenko oq-qizil-oq bayroqni “fashistik ramz” deb atadi, chunki u Buyuk Vatan urushi davrida Belarusning bosib olingan hududlarida foydalanilgan. Ushbu nuqtayi nazarga qarshi chiqqan fashistlar ko‘plab mamlakatlarda milliy bayroqlardan foydalanganini ta’kidlamoqda.
Izoh (0)