“Navalniyga nisbatan chiqarilgan hukm mamlakatdagi siyosiy vaziyatga ta’sir qilmaydi” – Dmitriy Peskov

Kreml Aleksey Navalniy ishi bo‘yicha sud qarori mamlakatdagi siyosiy vaziyatga sezilarli ta’sir ko‘rsatadi deb hisoblamaydi. Bu haqda “TASS” xabar qildi.

“Mamlakatdagi siyosiy vaziyat juda ko‘p qirrali. Mamlakat sentabr oyida bo‘lib o‘tadigan parlament saylovlariga tayyorgarlik ko‘rmoqda, ko‘plab turli jarayonlar bo‘lib o‘tmoqda, yangi partiyalar tuzilmoqda. Bu juda ko‘p qirrali jarayon, shuning uchun ehtimol qandaydir muhim ta’sir haqida gapirishning hojati yo‘q”, – dedi Rossiya prezidenti matbuot kotibi Dmitriy Peskov.

Shuningdek, u Rossiya prezidenti Vladimir Putinning ushbu sud qaroriga munosabatini bilmasligini aytdi.

“Men prezidentning har qanday reaksiyasidan xabardor emasman. Bilasizmi, biz an’anaviy ravishda sud hukmlari va qarorlariga hech qanday izoh bermaymiz”, – dedi Peskov. Kreml vakili voqeaga shaxsiy baho bermasligini qo‘shimcha qildi.

“Nima bo‘lganda ham, (men izoh bermayman) bu sud qarori, biz shunchaki izoh berishga haqqimiz yo‘q”, – deb tushuntirdi Peskov. Peskov Kreml Navalniyning 2-fevraldagi sud majlisidagi nutqi bilan tanishmaganligini ta’kidladi.

“Siz aytayotgan mahkum (Aleksey Navalniy) Rossiya prezidenti Vladimir Putinning tarixdagi rolini tavsiflay olmaydi, prezidentga faqatgina rus xalqi baho berishga haqli”, – deydi Peskov.

Rossiya prezidentining o‘zi tarixdagi o‘rni haqida o‘ylaydimi yoki yo‘qmi, degan savolga matbuot kotibi bu prezident muhokama qiladigan fikrlar emasligini aytdi.

“Prezident har kuni ishlaydi. Ko‘ryapsizmi, qancha muammolar, qancha dolzarb masalalari bor”, – dedi Peskov. Misol tariqasida u ijobiy va salbiy tomonlariga ega imtiyozli ipoteka dasturining muhokamasini keltirdi. Peskovning ta’kidlashicha, bunday mavzular “sxolastikadan mutlaqo yiroq, ammo millionlab ruslar hayotiga tegishli”.

“Bu prezident har kuni hukumat bilan qilayotgan ishi. U buning o‘rniga mahkumlarning ba’zi nutqlarini tinglasa yoki tarixdagi o‘rni haqida o‘ylasa, bu ahmoqlik hisoblanadi”, – deya xulosa qildi Kreml vakili.

Eslatib o‘tamiz, Moskvaning Simonovskiy sudi 2-fevral kuni Jazoni ijro etish federal xizmatining iltimosiga binoan Navalniyni “Iv Roshe” ishi bo‘yicha 3,5 yilga ozodlikdan mahrum qildi. U jazoni umumiy rejimdagi koloniyada o‘taydi.

Navalniy Jazoni ijro etish federal xizmatidan yashirinmagani va Germaniyada davolangani haqidagi himoya pozitsiyasini sud ishonib bo‘lmaydigan deb topdi.

AQSh tezkorlik bilan hech qanday shartlarsiz siyosatchi Aleksey Navalniyni ozodlikka chiqarishni talab qilmoqda. Bu haqda mamlakat davlat kotibi Entoni Blinken bayonot bilan chiqish qilgan.

“Biz Rossiya hukumatidan yana bir marta tezkorlik bilan hech qanday shartlarsiz janob Navalniyni ozodlikka chiqarishni so‘raymiz. Nafaqat u, balki asossiz ravishda hibsga olingan boshqa fuqarolarning ham huquqlari poymol bo‘lmasligi kerak va ular so‘z erkinligi, tinchlik yo‘li bilan yig‘ilishlar tashkil qilishga haqli”, – degan Blinken.

Shuningdek, Buyuk Britaniya tashqi ishlar vaziri Dominik Raab ham Navalniyni zudlik bilan ozod qilish haqida bayonot bergan.