Беларусь бош прокуратураси мамлакатда норозиликларнинг рамзига айланган оқ-қизил-оқ рангли байроқни экстремистик деб тан олиш учун ҳужжатлар тўпламини тайёрламоқда. Бу ҳақда Meduza хабар қилди.
Маълум қилинишича, бўлимга 100 дан ортиқ фуқаролардан «Буюк Ватан уруши пайтида Беларусь заминидаги шафқатсизлик рамзи бўлган» оқ-қизил-оқ байроқни таснифлаш, экстремистик рамз деб эълон қилиш ва уни оммавий намойишлар учун тақиқлаш тўғрисида мурожаатнома келиб тушган.
«Экстремизмга қарши курашиш тўғрисидаги қонун ҳужжатларини такомиллаштириш бўйича илгари Бош прокуратура томонидан олиб борилган ишларни ҳисобга олган ҳолда, биз ҳозирда оқ-қизил-оқ рангдаги байроқ ва бошқа рамзларни экстремистик деб тан олиш тўғрисида ҳужжатлар тўпламини тайёрламоқдамиз», — деди Бош прокуратуранинг расмий вакили Анжелика Курчак.
Ҳозир Беларусда оқ-қизил-оқ рангдаги байроқ рўйхатдан ўтмаган белги сифатида қайд этилган. У оммавий тадбирларда ишлатилиши мумкин эмас, лекин расмий равишда тақиқланмаган.
Эслатиб ўтамиз, 2020 йил 9 августда бўлиб ўтган президентлик сайловларидан сўнг Беларусда норозилик намойишлари бошланди. Намойиш иштирокчилари оқ-қизил-оқ рангдаги байроқдан кенг фойдаланишни бошлади. Байроқни биноларга ва иншоот томларига илиб қўйди.
Кейинчалик байроқлар (ҳатто оқ-қизил-оқ рангдаги кийимлар ҳам) олиб қўйилди. Байроқларни деразаларга ёки балконларга осиб қўйган одамларни рухсатсиз намойиш ўтказишда айблаб, жарима ва бир суткалик қамоқ тайинланди.
Александр Лукашенко оқ-қизил-оқ байроқни «фашистик рамз» деб атади, чунки у Буюк Ватан уруши даврида Беларуснинг босиб олинган ҳудудларида фойдаланилган. Ушбу нуқтайи назарга қарши чиққан фашистлар кўплаб мамлакатларда миллий байроқлардан фойдаланганини таъкидламоқда.
Изоҳ (0)