Yaponiyada yana besh kishida koronavirusning “britancha” shtammi aniqlandi. Bu haqda Yaponiya Sog‘liqni saqlash, mehnat va farovonlik vazirligi xabar berdi, deb yozadi “RBK”.
Bemorlar Saytama va Tokioda qayd etilgan bo‘lib, ular 40 yoshdan 60 yoshgacha bo‘lgan erkak va ayollardan iborat. Shulardan Saytamada yashaydigan uch nafari ish bo‘yicha ilgariroq shu shtamm aniqlangan bemorlar bilan muloqotda bo‘lgan. Yangi kasallanganlarning barchasi kasalxonaga yotqizilgan.
Buyuk Britaniya hukumati koronavirus mutatsiyasi paydo bo‘lgani haqida 14-dekabr kuni ma’lum qildi. Olimlar yangi shtamm avvalgilaridan 50—70 foizga yuqumliroq ekanini ta’kidladi. Buyuk Britaniya hukumati maslahatchisi Patrik Vallans ma’lum qilishicha, mutatsiya koronavirus infeksiyasidan o‘lim darajasini ham 30 foizga oshirgan.
Yaponiya hududida “britancha” shtamm birinchi marta 2020-yil dekabr oxirlarida qayd etildi. O‘shanda mamlakatda besh nafar bemor aniqlangan, ularning barchasi Britaniyadan qaytib kelgan fuqarolar edi. Ayni paytda Yaponiyada koronavirusning “britancha” shtammini yuqtirib olganlar soni 64 kishiga yetdi.
Pandemiya boshidan buyon Yaponiyada 387 229 kishi koronavirusga chalingan, 5688 kishi vafot etgan.
O‘zbekistonda koronavirusning “britancha” shtammi aniqlangani haqida 30-yanvar kuni ma’lum bo‘ldi. U Dubaydan kelgan fuqaroda qayd etilgan.
Izoh (0)