Toshkent shahri Chilonzor tumanidagi bozor omborxonasidan qiymati 45 million so‘mdan ortiq bo‘lgan ayollar oyoq kiyimini o‘g‘irlagan shaxs qo‘lga olindi, deya xabar qilmoqda Tergov departamenti.
Ma’lum qilinishicha, 2021-yilning 9-yanvar kuni soat 05:30 da 27 yoshli L.B. Chilonzor tumani Bunyodkor shohko‘chasi “Do‘stlik” dehqon bozori yonidagi omborxonaga kalit tanlash yo‘li bilan g‘ayriqonuniy ravishda kirib, 40 yoshli Z.X.ga tegishli 1 dona qop ichida bo‘lgan umumiy bahosi 4 680 000 so‘mlik jami 36 juft ayollar oyoq kiyimini o‘g‘irlab, hodisa joyidan yashiringan.
Mazkur holat yuzasidan Chilonzor tumani IIO FMB huzuridagi tergov bo‘limi tomonidan fuqaro L.B.ga nisbatan Jinoyat kodeksining 169-moddasi 2-qismi “g” bandi (uy-joy, omborxona yoki boshqa xonaga g‘ayriqonuniy ravishda kirib, sodir etilgan o‘g‘rilik) bilan jinoyat ishi qo‘zg‘atilgan.
Bundan tashqari, L.B. o‘zining jinoiy faoliyatini davom ettirib, 2021-yilning 12-yanvardan 1-yanvar kuniga qadar shu omborxonadan fuqaro Z.X.ga tegishli umumiy bahosi 40 million 560 ming so‘mlik ayollar oyoq kiyimlarini yashirin ravishda talon-toroj qilib, hodisa joyidan yashiringan.
Mazkur holat yuzasidan L.B.ga nisbatan Jinoyat kodeksining 169-moddasi 2-qismi “g” bandi va 169-moddasi 3-qismi “a” bandi (takroran sodir etilgan o‘g‘rilik) bilan ayb e’lon qilinib, unga nisbatan qamoqqa olish tarzidagi ehtiyot chorasi qo‘llanilgan.
Hozirda dastlabki tergov harakatlari olib borilmoqda.
Avvalroq Toshkentda maktablardagi texnikalarni o‘g‘irlash bilan shug‘ullangan jinoiy guruh, Shayxontohurdagi masjidga kelgan fuqaroning 5400 dollarini o‘g‘irlab ketgan shaxs hamda Oloy bozoridagi do‘kondan 50 million so‘mlik zargarlik buyumlarini o‘g‘irlagan yigitlar qo‘lga olingani haqida xabar berilgandi.
Izoh (0)