Тошкент шаҳри Чилонзор туманидаги бозор омборхонасидан қиймати 45 миллион сўмдан ортиқ бўлган аёллар оёқ кийимини ўғирлаган шахс қўлга олинди, дея хабар қилмоқда Тергов департаменти.
Маълум қилинишича, 2021 йилнинг 9 январь куни соат 05:30 да 27 ёшли Л.Б. Чилонзор тумани Бунёдкор шоҳкўчаси «Дўстлик» деҳқон бозори ёнидаги омборхонага калит танлаш йўли билан ғайриқонуний равишда кириб, 40 ёшли З.Х.га тегишли 1 дона қоп ичида бўлган умумий баҳоси 4 680 000 сўмлик жами 36 жуфт аёллар оёқ кийимини ўғирлаб, ҳодиса жойидан яширинган.
Мазкур ҳолат юзасидан Чилонзор тумани ИИО ФМБ ҳузуридаги тергов бўлими томонидан фуқаро Л.Б.га нисбатан Жиноят кодексининг 169-моддаси 2-қисми «г» банди (уй-жой, омборхона ёки бошқа хонага ғайриқонуний равишда кириб, содир этилган ўғрилик) билан жиноят иши қўзғатилган.
Бундан ташқари, Л.Б. ўзининг жиноий фаолиятини давом эттириб, 2021 йилнинг 12 январдан 1 январь кунига қадар шу омборхонадан фуқаро З.Х.га тегишли умумий баҳоси 40 миллион 560 минг сўмлик аёллар оёқ кийимларини яширин равишда талон-торож қилиб, ҳодиса жойидан яширинган.
Мазкур ҳолат юзасидан Л.Б.га нисбатан Жиноят кодексининг 169-моддаси 2-қисми «г» банди ва 169-моддаси 3-қисми «а» банди (такроран содир этилган ўғрилик) билан айб эълон қилиниб, унга нисбатан қамоққа олиш тарзидаги эҳтиёт чораси қўлланилган.
Ҳозирда дастлабки тергов ҳаракатлари олиб борилмоқда.
Аввалроқ Тошкентда мактаблардаги техникаларни ўғирлаш билан шуғулланган жиноий гуруҳ, Шайхонтоҳурдаги масжидга келган фуқаронинг 5400 долларини ўғирлаб кетган шахс ҳамда Олой бозоридаги дўкондан 50 миллион сўмлик заргарлик буюмларини ўғирлаган йигитлар қўлга олингани ҳақида хабар берилганди.
Изоҳ (0)