Shavkat Mirziyoyev: “Afsuski, O‘zbekistonda xattotlik maktabi yo‘q bo‘lib ketyapti”

Prezident Shavkat Mirziyoyev 29-yanvar kuni Islom sivilizatsiyasi markaziga tashrif buyurib, qurilish jarayoniga mas’ul bo‘lgan mutasaddilar va tarixchi olimlar bilan muloqot qildi. Uchrashuv mobaynida davlat rahbari O‘zbekistonda xattotlik maktabiga e’tiborni yanada kuchaytirish zarurligini qayd etdi, deya xabar bermoqda “Daryo” muxbiri.

“Bizda xattotlik maktabi yo‘q. Afsuski, bu maktablar yo‘q bo‘lib ketyapti. O‘zbekistondagi yagona xattotlardan biri Habibulla aka bor xolos hozir.

Bugungi kunda bir qancha musulmon mamlakatlarda xattotlik juda rivojlangan. Masalan, Turkiyada. Shuning uchun xattotlar maktabini yaratishimiz kerak. Xattotlik yaxshi yo‘nalish. Undagi har bir belgi, vergul va nuqtaning tagida katta ma’no bor. Agar bu maktabni yaratmasak, yana ancha orqada qolib ketamiz.

Odamlar aytishi mumkin, bu qayerda kerak bo‘ladi, deb. Kerak bo‘ladi. Mana, katta-katta ilmiy maktablar quryapmiz, tillarga nisbatan munosabatimiz o‘zgaryapti, demak, kerak bo‘ladi. Xorijdan yaxshi xattotlarni olib kelib, o‘z maktabimizni yanada rivojlantirishimiz zarur”, — deya mas’ullarga topshiriq berdi Shavkat Mirziyoyev.

Bosh vazir Abdulla Aripovning ta’kidlashicha, endilikda respublikadagi bir qator diniy markazlar, oliy o‘quv yurtlari va Benkov nomidagi respublika rassomlik kollejida xattotlik guruhlari ochiladi. Bundan tashqari, har yili xattotlar o‘rtasida ko‘rik-tanlovlar o‘tkazish yo‘lga qo‘yiladi.