Ўзбекистонда 2020 йилда ноқонуний дарахт кесилиши билан боғлиқ жами 3 960 та ҳуқуқбузарлик аниқланган. Бу ҳақда Давлат экология қўмитаси ахборот хизмати раҳбари Бунёд Абдуллаев АОКАда бўлиб ўтган брифингда маълум қилди.
Маълум қилинишича, 2020 йил давомида ўтказилган давлат экологик назорати натижаларига кўра дарахт ва буталарни ноқонуний кесилиши билан боғлиқ жами 3 960 та ҳуқуқбузарлик содир этилган. Ноқонуний дарахткесарларнинг 136 нафари мансабдор шахс экани аниқланган.
Ҳуқуқбузарларга жами 4 миллиард 578 миллион сўм жарима солинган, ўсимлик дунёсига етказилган зарар миқдори эса — 15 миллиард 305 миллион сўмни ташкил этмоқда.
«18 та ҳолат бўйича қонунбузарлик содир этган шахсларга нисбатан жиноий иш қўзғатилган. Ҳуқуқбузарлардан 127 та қурол-аслаҳалар ашёвий далил сифатида олиб қўйилган», — деди қўмита вакили.
Таъкидланишича, 2 724 метр куб бута, 7 812 дона дарахт шундан, 3 428 дона қимматли ва 4 384 дона камёб ва қимматбаҳо дарахт ноқонуний равишда кесилган.
Аввалроқ Қарши ҳокимияти саноат зонаси қуриш учун деярли 2900 туп дарахтни кесиб ташлагани, Жаҳонгир Ортиқхўжаев пойтахтда 30 млрд сўмга дарахт экишни таклиф қилгани ҳамда Ўзбекистонда ноқонуний кесилган ҳар туп дарахт учун 100 туп кўчат экишни мажбурий этиш таклиф қилингани ҳақида хабар берилганди.
Изоҳ (0)