Тошкентда Алишер Навоий номидаги давлат академик катта театри олдидаги концерт майдонида очиқ муз майдонидан сўнг Iosis Fest рок-фестивали ўтказилди.
Дастурга мувофиқ муайян бир кунда чиқиш қилган ҳар бир рок гуруҳи концерт санаси ва вақти кўрсатилган реклама анонсини эълон қилади. Хусусан, Flyin Up 24 январь куни ушбу фестиваль доирасида чиқиш қилган. Шу муносабат билан улар ижтимоий тармоқларда реклама афишасини эълон қилган бўлиб, унда ўзбек тилининг асосчиси, донишманд Алишер Навоий шу номли театр фонида қўлида электрон гитара ушлаб турган ҳолда тасвирланган.
Алишер Навоий номидаги давлат академик катта театри маъмурияти бу ҳолатга эътироз билдирган ва уни «бачкана кўриниш» деб атаган.
«Буюк мутафаккир ва файласуф олим, ўзбек тилининг асосчиси, донишманд бобокалонимиз Алишер Навоийни на динимиз, на миллатимиз ва на тарихимиз, қўйингки, ўзига ҳам алоқаси бўлмаган ҳолатда, бармоқларини бу кўринишда, бурни қизарган, ғалати белгилари бор мусиқа асбоби билан тасвирлангани тушунарсиз... Афсуски, баъзи блогерлар савияси шу даражадами ёки бу атайин қилинган қитмирликми?» — деган маъмурият ва ижрочилардан ҳамда соҳа мутасаддиларидан расмий изоҳ ва муносабат талаб қилган.
Flyin Up бунга муносабат билдириб, ушбу афиша тор доирадаги аудиторияга — гуруҳнинг мухлисларига мўлжаллангани, ҳеч қаерда реклама қилинмагани, фақат гуруҳнинг ижтимоий тармоқларидаги саҳифаларида эълон қилинганини билдирган.
Гуруҳ вакилларига деярли ярим тунда қўнғироқ қилиб, уларнинг чиқиши ва фестивалнинг ўзи бекор қилинишининг олдини олиш учун Алишер Навоий образи акс этган постерни олиб ташлаш «юмшоқлик билан» сўралганини айтган.
«Биз, табиийки, уни ўчириб ташладик, чунки Тошкент анчадан бери кўрмаган шаҳар аҳолисига ажойиб фестиваль тақдим этган ташкилотчиларнинг меҳнатини қадрлаймиз», — деб қайд этган Flyin Up ва гуруҳ нотижорий, мустақил гуруҳ эканлигини, фестиваль ташкилотчилари уларни ўзлари иштирок этиш учун чақиргани, бунинг учун уларга пул берилмаслигини билдириб ўтган.
Шундан сўнг афишанинг янгиланган кўринишини ҳавола этган.
Эслатиб ўтамиз, 7 январь куни Алишер Навоий номидаги давлат академик катта театри олдида муз майдони очилди. У «аҳоли орасида соғлом турмуш тарзи ҳамда спортни кенг тарғиб қилиш» мақсадида ташкил этилган. Муз майдони бир ой муддатга ўрнатилган бўлиб, бу вақт мобайнида Dance Music Fest Winter, Iosis Fest, Tashkent Rap Festival каби мусиқа фестиваллари, хоккей бўйича ўсмирлар чемпионати, муз устида рақс шоуси каби тадбирлар ўтказилади.
Изоҳ (0)