Қорақалпоғистоннинг Беруний туманида Nexia ва Howo юк машинаси иштирокида содир бўлган ЙТҲ оқибатида беш киши ҳалок бўлди. Бу ҳақда «Ёшлар» телеканалининг «Янги давр» информацион дастурида маълум қилинди.
Маълумотларга кўра, 21 январь, пайшанба куни соат 15:25 ларда Беруний тумани Ғузор—Бухоро—Нукус—Бейнеу автомагистралининг 651-километрида 1982 йилда туғилган фуқаро бошқарувидаги Nexia-2 Беруний тумани томон ҳаракатланиб келаётган Howo юк машинаси билан тўқнашиб кетган. Содир бўлган тўқнашув оқибатида енгил машина ҳайдовчиси ва йўловчилардан бири воқеа жойида ҳалок бўлган.
Шунингдек, Nexia-2 салонида бўлган бошқа йўловчилар туман тиббиёт бирлашмаси жонлантириш бўлимига олиб келинган, бироқ кўрсатилган тез тиббий ёрдам қарамай, уларнинг ҳаётини сақлаб қолишнинг имкони бўлмаган.
Таъкидланишича, авария қор ёғгани сабабли йўлларнинг сирпанчиқ ҳолга келиб қолгани оқибатида юзага келган.
«Катта тезликда ҳаракатланган Nexia қарама-қарши йўналишда ҳаракатланиб келаётган Howo юк машинасининг қаршисига чиқиб кетган», — дейилади хабарда.
Аввалроқ Бектемирда Howo оғир юк машинаси Cobalt устига ағдарилиши оқибатида бир киши вафот этгани, шунингдек, Хоразмда Nexia ва Howo тўқнашуви оқибатида бир киши ҳалок бўлгани тўғрисида хабар берилганди.
Изоҳ (0)