Рио-де-Жанейро мэри Эдуардо Паес ёзда ўтказиладиган карнавални бекор қилиш тўғрисида қарор қабул қилди. Бу ҳақда у Twitter’да маълум қилди, деб ёзмоқда «РБК».
Паес карнавалга бўлган қизиқишини ҳеч қачон беркитмаслигини ва шаҳар иқтисодиёти учун мазкур маданий тадбирнинг аҳамияти нақадар катталигини таъкидлади. Шунга қарамай, шаҳар мэри «ҳатто июль ойида ҳам тадбир ўтказишни ўйлаш бефойда» деб ҳисоблайди.
Рио раҳбари тадбирни ташкиллаштиришга катта тайёргарлик талаб этилишини таъкидлади. Шунингдек, у карнавални ташкиллаштиришга алоқадор бўлган ташкилотларни бирмунча қўллаб-қувватлайдиган ҳужжатларни тайёрлаш ҳақида кўрсатма берганини айтди.
Рио-де-Жанейрода карнавал анъанага кўра беш кун давом этади. Гиннеснинг рекордлар китоби 2004 йилда уни дунёдаги энг катта карнавал деб атаган. Тадбирга бир кунда 2 миллион киши қатнашади.
Бразилия коронавирус юқтириб олганлар сони бўйича дунёда 3-ўринда турибди. Бразилия Соғлиқни сақлаш вазирлигининг маълумотларига кўра, мамлакатда вирусга чалиниш бўйича 8 697 368 та ҳолат тасдиқланган.
Коронавирус пандемияси туфайли дунёда кўплаб оммавий тадбирлар, шу жумладан, Женевадаги автомобиль ҳамда Лондондаги китоб кўргазмаси бекор қилинган.
Декабрь ойида бразилиялик олимлар коронавируснинг янги штаммини Рио-де-Жанейро штатида аниқлагани ҳамда ушбу B.1.1.28 мутация мамлакат ҳудудида тарқалишга улгургани ҳақида хабар берилганди.
Изоҳ (0)