O‘zbekistondagi ayrim avtomobil ishlab chiqaruvchilar berilgan imtiyoz va preferensiyalarni qisqartirish va bozorning barcha ishtirokchilari uchun teng sharoitlarni yaratish kerak. Bu haqda 13-yanvar kuni Prezident raisligida o‘tkazilgan yig‘ilishdan so‘ng, Monopoliyaga qarshi kurashish qo‘mitasi rahbari Najmiddinxo‘ja Sharipov “O‘zbekiston 24” telekanaliga bergan intervyusida ma’lum qildi.
Foto: “Gazeta.uz”
Yig‘ilishda Prezident Shavkat Mirziyoyev xususiy investorlar mamlakatda umumiy qiymati 276 million dollarlik 8 ta loyihani amalga oshirish taklifini bildirayotganini ma’lum qilgan. U “O‘zavtosanoat” faoliyatini transformatsiya qilish, ishlab chiqaruvchilar uchun teng sharoitlar yaratish va sanoat mashinalarini yig‘ish bo‘yicha nizomni tasdiqlatish uchun ofis yaratish topshirig‘ini bergan.
“Avtomobil sanoati mamlakatimiz iqtisodiyotining eng muhim sohalaridan biri hisoblanadi. Bir tarafdan ushbu soha ko‘plab ish o‘rinlarini yaratadi, zavodlarimiz atrofida ko‘plab ishlab chiqarish korxonalari shakllanmoqda, yildan yilga soliq to‘lovlari ko‘paymoqda. Boshqa tarafdan esa avtomobil ishlab chiqaruvchimiz bozordagi monopol mavqeini saqlab kelyapti”, — deydi Najmiddinxo‘ja Sharipov.
Uning so‘zlariga ko‘ra, Prezident mazkur sohadagi raqobatni kuchaytirish va bozorning barcha ishtirokchilari uchun teng sharoit yaratish topshirig‘ini bergan.
“Ya’ni mazkur sohada imtiyoz beriladigan bo‘lsa, ushbu imtiyoz barcha korxonalarga taalluqli bo‘lishi kerak. Raqobatni rivojlantirish uchun ayrim ishlab chiqaruvchilarga berilgan imtiyozlar va eksklyuziv huquqlarni qisqartirishimiz, shuningdek, barcha korxonalarni teng sharoitlar bilan ta’minlashimiz kerak”, — deydi qo‘mita rahbari.
Najmiddinxo‘ja Sharipovning ma’lum qilishicha, Prezident tomonidan qo‘yilgan vazifalarni bajarishda Monopoliyaga qarshi kurashish qo‘mitasi birinchi navbatda, iste’molchilar manfaatidan kelib chiqadi.
“O‘zavtosanoat” raisi Shavkat Umrzoqovning ma’lum qilishicha, O‘zbekistonda avtomobillarni sanoat yig‘ishi bo‘yicha nizom ishlab chiqilib, qabul qilinadi. Uning so‘zlariga ko‘ra, bu O‘zbekistonga “tannarx borasidagi ochiq raqobatni, istiqbolda avtombil sohasi jozibadroligini oshirish”ga yordam beradi.
Iqtisodiy taraqqiyot va kambag‘allikni qisqartirish vaziri o‘rinbosari Bobur Abdunazarovning ta’kidlashicha, vazirlik avtomobilsozlik va qishloq xo‘jaligi texnikasi tarmog‘ini transformatsiya qilishga mas’ul etib belgilangan.
Avvalroq “O‘zavtosanoat” matbuot xizmati 2010–2020-yillarda to‘langan soliqlar dinamikasini e’lon qilgandi. Unga ko‘ra, 2018-yildan 2020-yilgacha “O‘zavtosanoat” tarkibiga kiruvchi korxonalar 9 trillion so‘mdan ortiq soliq to‘lagan. Shuningdek, “O‘zavtosanoat” tizimidagi avtotransport vositalari ishlab chiqaruvchilari tomonidan 2020-yil davomida yangi avtotransport vositalarini sotib olganlik uchun belgilangan yig‘imlar to‘lanmagan. Masalan, UzAuto Motors tomonidan 2020-yilning yanvar—sentabr oylarida 582,6 milliard so‘m yig‘im to‘lanmagan.
