Amerika Qo‘shma Shtatlarida koronavirus infeksiyasini yuqtirganlar soni 24 million 62 mingdan oshdi, deya xabar beradi “Kommersant” Jons Hopkins universiteti ma’lumotiga tayanib.
So‘nggi bir kecha-kunduzda mamlakatda deyarli 180 mingga yaqin yangi kasallanish holati qayd etildi. Ayni vaqtgacha jami 283 milliondan ortiq odam koronavirusga test topshirdi.
AQShda COVID-19 qurbonlari soni 398 mingga yetdi. O‘tgan bir kecha-kunduzda 1,7 ming nafar kishi vafot etdi, avvalgi kuni mazkur ko‘rsatkich 3,3 ming nafarni tashkil qilgan edi.
Virus yuqtirganlar va o‘limlar soni bo‘yicha AQSh yetakchi bo‘lib qolmoqda. Umuman olganda, dunyo bo‘ylab 95,5 million odam koronavirusga chalindi va deyarli 2 million kishi vafot etdi.
Eslatib o‘tamiz, AQShda Pfizer va BioNTech vaksinalari bilan aholini emlash 14-dekabr kuni boshlangan.
Avvalroq AQShda 11 million dozadan ortiq vaksina ishlatilgani hamda umumiy hisobda 9,7 million kishi emlangani haqida xabar berilgan edi. Ularning 1,3 millioni koronavirusga qarshi immunitetning shakllanishi uchun zarur bo‘lgan vaksinaning ikkinchi dozasini olgan.
Izoh (0)