Qozog‘iston hukumati o‘z fuqarolarini Rossiyaning “Sputnik V” vaksinasi bilan 1-fevraldan emlashni boshlaydi. Bu haqda mamlakat sog‘liqni saqlash vaziri Aleksey Soyga tayanib “Kommersant” xabar berdi.
“2021-yil 19-yanvar kuni Qarag‘anda farmatsevtika majmuasi va Rossiya to‘g‘ridan to‘g‘ri investitsiya fondi o‘rtasida ‘Sputnik V’ning birinchi partiyasi — 20 ming doza vaksinani yetkazib berish bo‘yicha bitim imzolanishi rejalashtirilgan. 20-yanvar kuni bir martalik import uchun ruxsatnoma beriladi va vazirlik ‘SK-Farmatsiya’ga maxsus xaridni amalga oshirish uchun xatlar yuboradi. 1-fevraldan aholi o‘rtasida koronavirus infeksiyasiga qarshi vaksinatsiyani boshlash rejalashtirilgan”, — deydi Soy.
Vazirning qo‘shimcha qilishicha, vaksinatsiya vaksinalarning kelishiga qarab bosqichma-bosqich amalga oshiriladi. Birinchi navbatda, yuqumli kasalliklar shifoxonasi, tez yordam, reanimatsiya bo‘limi, kasalxonalardagi qabulxonalarda ishlovchi shifokorlar, sanitariya-epidemiologik xizmat xodimlarini emlash reja qilingan. Shundan so‘ng maktab va OTMlardagi pedagoglar emlanadi. Vaksinatsiyaning uchinchi bosqichida surunkali kasalligi bor va boshqa toifaga kiruvchi fuqarolarni emlash boshlanadi. Yil oxiriga qadar Qozog‘istonda 6 millionga yaqin fuqaroni emlash rejalashtirilgan.
Eslatib o‘tamiz, 2020-yilning dekabr oxirlarida Qozog‘iston bosh vaziri Asqar Mamin Qozog‘iston va Rossiya prezidentlari Qosim-Jo‘mart To‘qayev hamda Vladimir Putin o‘rtasidagi kelishuvlarni amalga oshirish doirasida Qarag‘anda farmatsevtika majmuasiga tashrif buyurib, “Sputnik V” vaksinasini ishlab chiqarishga start bergandi. Majmua bazasida bosqichma-bosqich 2 million doza vaksina ishlab chiqarish rejalashtirilgan.
Ma’lumot uchun, sentabr o‘rtalarida Qozog‘istonda QazCovid-in vaksinasining klinik sinovlari boshlangan. Qozog‘iston ta’lim va fan vaziri mamlakatda ishlab chiqilgan ushbu vaksinani o‘zida sinab ko‘rganini ma’lum qilgan.
Izoh (0)