O‘tgan hafta Oregon shtatida noodatiy o‘g‘irlik sodir bo‘ldi. Erkak yo‘ltanlamasni minib qochgan va orqa o‘rindiqda bolakay borligini payqab qolgan. U jinoyat joyiga qaytib, bolani onasiga topshirgan va uni e’tiborsizligi uchun politsiyaga topshirish bilan qo‘rqitgan. Shu bilan birga, u o‘g‘irlangan avtomobilni o‘zida qoldirishga qaror qilgan, deb xabar beradi Motor.
16-yanvar kuni amerikalik ayol o‘zining 2013-yilda ishlab chiqarilgan kumushrang Honda Pilot’ini avtoturargohda qoldirib, sut va go‘sht olish uchun do‘konga kirib ketgan. Mashina orqa o‘rindig‘ida uning to‘rt yoshli qizi bo‘lgan. Ona avtomobildan besh daqiqaga uzoqlashganiga qaramay, u katta xatoga yo‘l qo‘ygan: motorni o‘chirmagan va eshiklarni yopmagan.
O‘g‘ri ushbu vaziyatdan foydalanib qolgan. U mashinaga o‘tirib, avtoturargohdan chiqib ketgan va biroz o‘tgach bolalar o‘rindig‘ida o‘tirgan qizchaga ko‘zi tushgan. Shunda u ortga qaytib, yana do‘konga kelgan: u yerda mashina egasini topib, qizchani qo‘liga topshirgan va bolasiga yaxshi qaramagani uchun ayolni urishib bergan.
Ayol mashina ichidan qizini tushirib olishi bilan o‘g‘ri mashinani noma’lum yo‘nalish tomon minib ketgan. Politsiyaning ta’kidlashicha, ular o‘g‘ridan bolani qaytargani uchun minnatdor va hozirda o‘g‘irlangan Honda’ni qidirish bilan shug‘ullanmoqda.
Avvalroq Amerikada 500 ming dollar turadigan BMW’ni o‘g‘irlab qochgan jinoyatchi YTHga uchragani to‘g‘risida xabar berilgandi.
Izoh (0)