Italiyada 1978-yilda ishlab chiqarilganidan buyon 78 kilometr yo‘l bosgan “Moskvich-2137” sotuvga qo‘yildi. Sotuvchi mazkur mashinani 16,5 ming dollarga baholagan. Taqqoslash uchun, ushbu pulga Rossiyada yangi Toyota Corolla xarid qilish mumkin, deb xabar beradi Motor.
Sotuvga qo‘yilgan nusxaning o‘ziga xosligi shundaki, u 42 yil davomida biror marta ro‘yxatga qo‘yilmagan va odometrga ko‘ra, deyarli yo‘l bosmagan. Shunga qaramay, “Moskvich” to‘rt marotaba o‘z egasini almashtirgan, umuman olganda deyarli bitta garajda turgan. Sotuvchi avtomobilning hujjatlarni taqdim etishga qiynalgan.
“Moskvich-2137” modelining eksport versiyasi Italiyaga 1970-yillar oxirida borib qolgan. E’lon muallifining so‘zlariga ko‘ra, mashina xuddi zavoddan chiqqan holatidagidek saqlangan — hatto o‘t oldirish “svecha”lari ham original. Biroq mashina baribir ta’mirtalab, xususan, kuzovining ayrim qismlari zanglagan, tormoz tizimlari va benzanasosini tekshirish kerak.
E’londa noaniqlik bor: ma’lumotlar jadvalida avtomobil 1,5 ming kilometr yo‘l bosgani qayd etilgan, odometrda esa ushbu ko‘rsatkich 78 kilometr. Aftidan, sotuvchi postni e’lon qilish vaqtida chalkashlikka yo‘l qo‘ygan — dvigatel hajmi 1500 kub santimetr bandini adashtirib yuborgan ko‘rinadi. Motorining quvvati 75 ot kuchiga teng.
Avvalroq Moskvada pikap kuzovidagi 25 yillik noyob “Moskvich” 12 ming dollarga sotilayotgani to‘g‘risida xabar berilgandi.
Izoh (0)