Toshkentda 80 kishini pandemiya sharoitida chet elga davolanish uchun yuborishni va’da qilib, ulardan jami 94,8 ming dollar olgan aviakassa rahbari firibgarlikda gumonlanib qo‘lga olindi. Bu haqda IIV JQBB Korrupsiya va iqtisodiy jinoyatlarga qarshi kurashish boshqarmasi xabar berdi.
Ma’lumotlarga ko‘ra, 13-yanvar kuni Ichki ishlar vazirligi Jinoyat qidiruv bosh boshqarmasi Korrupsiya va iqtisodiy jinoyatlarga qarshi kurashish boshqarmasi hamda Davlat xavfsizlik xizmati xodimlari hamkorligida tezkor tadbir o‘tkazilgan.
Tadbir davomida Toshkent shahri Shota Rustaveli ko‘chasida joylashgan Humo Trans aviakassa rahbari K.Ye. ushbu aviakassada fuqaro M.Z.ni aldab, pandemiya sharoitida chet davlatga davolanish uchun borishga asos bo‘luvchi kasalligi haqida hujjat tayyorlab berishiga va shu hujjatga asosan Rossiyaga bemalol borishi mumkinligiga ishontirib, uning 1450 AQSh dollarini olgan vaqtida ashyoviy dalillar bilan ushlangan.
Olib borilgan tezkor qidiruv ishlari davomida fuqaro K.Ye. bundan avval ham 79 nafar fuqaroni shu usulda aldab, ularning har biridan 1200 AQSh dollaridan jami 94 800 dollar miqdoridagi pul mablag‘larini qo‘lga kiritganligi aniqlangan.
Mazkur holat yuzasidan Toshkent shahar IIB huzuridagi Tergov boshqarmasi tomonidan fuqaro K.Ye.ga nisbatan Jinoyat kodeksining 168-moddasi (firibgarlik) 4-qismi “a” bandi bilan jinoyat ishi qo‘zg‘atilib, u qamoqqa olingan.
Hozirda jinoyat ishi yuzasidan tergov harakatlari olib borilmoqda.
Avvalroq Buxoroda koronavirusga chalingan fuqaroga kompensatsiya puli to‘g‘rilab berish evaziga 200 dollar talab qilgan shaxs ushlangani, shuningdek, Samarqandda fuqaroga kam ta’minlangan oilalarga ajratilgan 5 ta xonadonni olib berishni va’da qilgan shaxs qo‘lga olingani to‘g‘risida xabar berilgandi.
Izoh (0)