“Daryo” o‘quvchilaridan biri chilim chekayotgan bog‘cha opalar videosini yuborib, Qashqadaryodagi bog‘chalarda chilim chekayotgan ayollar faoliyat yuritayotganini ma’lum qildi.
Foto: “Daryo”
Video muallifining ma’lumot berishicha, chilim chekayotgan bog‘cha opalar Qashqadaryoning Mirishkor tumanidagi 8-sonli maktabgacha ta’lim tashkilotida faoliyat yuritadi.
Ta’kidlanishicha, Durdona Toirova rahbarligidagi mazkur ta’lim dargohida ta’lim-tarbiya qoniqarsiz ahvolda.
Murojaatchi taqdim qilgan suratlarda tarbiyalanuvchilarning pala-partish ovqatlanayotgani aks etgan.
“Bu bog‘chada har doim shu ahvol. Sababi nazorat yo‘q. Ta’lim-tarbiyani so‘raydigan odam yo‘q”, — deydi “Daryo” muxbiri bilan muloqot qilgan murojaatchi.
Foto: “Daryo”
“Daryo” muxbiri bilan suhbatlashgan 8-maktabgacha ta’lim tashkiloti rahbari Durdona Toirova esa videodagi holat rahbarligidagi bog‘chada sodir bo‘lganini tasdiqlab, voqeaga oydinlik kiritilayotganini bildirdi.
“Hozir besh nafar xodimimizni bo‘limga chaqirishgan. Shu voqeaga oydinlik kiritilmoqda”, — deydi bog‘cha mudirasi.
Durdona Toirovaning ma’lumot berishicha, tumanning Chandir qishlog‘idagi mazkur bog‘cha 200 o‘rinli bo‘lib, hozirda 120 nafar bola tarbiyalanmoqda. Ta’lim dargohida 29 nafar xodim faoliyat yuritadi.
Mirishkor tuman maktabgacha ta’lim bo‘limi boshlig‘i Mavjuda Jumayevaning “Daryo”ga ma’lum qilishicha, mazkur voqea bo‘yicha bog‘chaning 5 nafar xodimi — hamshira, oshpaz va uch nafar yordamchi tarbiyachi hamda rahbari ishdan olingan.
