Ижтимоий тармоқларда мактабгача таълим ташкилоти мудирасининг тарбияланувчини ураётгани акс этган видеолавҳа тарқалди. Ҳолат юзасидан Самарқанд вилояти прокуратураси маълумот берди.
Аниқланишича, воқеа Самарқанд вилояти Булунғур туманидаги 13-сонли МТМда содир бўлган. Ҳодиса юзасидан ҳозирда Булунғур туман прокуратураси томонидан терговга қадар текширув ҳаракатлари олиб борилаётганлиги маълум қилинди.
«Gazeta.uz»нинг маълум қилинишича, МТМ мудираси Роҳатой Аҳророва «Zamon» кўрсатувига берган интервьюсида видеолавҳага изоҳ берар экан, ўзини тўғри тута олмаганини ва қизиққонлик қилганини таъкидлади. У боланинг ҳақоратли сўзлар айтганини маълум қилган.
«Жуда ҳам жаҳлим чиқди. Чунки гуруҳда 30 га яқин бола бор эди. Тўғри, уриш мумкин эмас, лекин муомала билан қилса, боланинг келажаги нима бўлади?» — деди мудира.
Аввалроқ Миришкор туманида чилим чеккан боғча опалар видеоси тарқалгани ва улар ишдан олингани, Фарғонада 2 туп чинор ва бир туп толни ноқонуний кестирган боғча мудирасига 15 млн сўм жарима ёзилгани ҳамда Мактабгача таълим вазирлиги Андижонда ишини йўқотган боғча мудираси ўзини осиб қўйгани юзасидан расмий изоҳ бергани ҳақида хабар берилганди.
Изоҳ (0)