Davronjon Qobiljonovich Odilov Prezidentning 14-yanvardagi farmoni bilan Qurilish vazirining birinchi o‘rinbosari etib tayinlandi, deb xabar qildi Adliya vazirligi.
“Gazeta.uz” yozishicha, Davronjon Odilov avval ushbu lavozimda ishlagan va 14-yanvar kuni Qonunchilik palatasi deputatlarining yig‘ilishida uy-joy kommunal xizmat ko‘rsatish vaziri etib tasdiqlangan Sherzod Hidoyatovning o‘rnini egallaydi.
Ta’kidlanishicha, Davronjon Odilov amaldagi lavozimga tayinlanishidan oldin Gold Step Invest kompaniyasining qurilish ishlari bo‘yicha direktor o‘rinbosari bo‘lib ishlagan.
Kompaniya Sardoba suv ombori to‘g‘oni buzilganidan keyin Sirdaryo viloyati Sardoba tumanidagi “Do‘stlik” mahallasida ko‘p qavatli binolar, shuningdek, Mega Planet savdo-ko‘ngilochar markazi, Parus savdo markazi, Mercato savdo markazi, Sergeli tumanidagi 16 qavatli bino, Al-Xorazmiy nomidagi ixtisoslashtirilgan axborot texnologiyalari maktabi, Toshkentdagi Yeoju instituti, Shedevr turar-joy majmuasi va boshqa binolar qurilishida qatnashgan.
Avvalroq Abduqodir Toshqulov oliy ta’lim vaziri, Sherzod Hidoyatov kommunal xizmat ko‘rsatish vaziri lavozimiga tayinlangani, sobiq oliy ta’lim vaziri Inomjon Majidov esa O‘zbekiston Milliy universiteti rektorligiga tayinlangani haqida xabar berilgandi.
Izoh (0)