Давронжон Қобилжонович Одилов Президентнинг 14 январдаги фармони билан Қурилиш вазирининг биринчи ўринбосари этиб тайинланди, деб хабар қилди Адлия вазирлиги.
«Gazeta.uz» ёзишича, Давронжон Одилов аввал ушбу лавозимда ишлаган ва 14 январь куни Қонунчилик палатаси депутатларининг йиғилишида уй-жой коммунал хизмат кўрсатиш вазири этиб тасдиқланган Шерзод Ҳидоятовнинг ўрнини эгаллайди.
Таъкидланишича, Давронжон Одилов амалдаги лавозимга тайинланишидан олдин Gold Step Invest компаниясининг қурилиш ишлари бўйича директор ўринбосари бўлиб ишлаган.
Компания Сардоба сув омбори тўғони бузилганидан кейин Сирдарё вилояти Сардоба туманидаги «Дўстлик» маҳалласида кўп қаватли бинолар, шунингдек, Mega Planet савдо-кўнгилочар маркази, Парус савдо маркази, Mercato савдо маркази, Сергели туманидаги 16 қаватли бино, Ал-Хоразмий номидаги ихтисослаштирилган ахборот технологиялари мактаби, Тошкентдаги Ёжу институти, Shedevr турар-жой мажмуаси ва бошқа бинолар қурилишида қатнашган.
Аввалроқ Абдуқодир Тошқулов олий таълим вазири, Шерзод Ҳидоятов коммунал хизмат кўрсатиш вазири лавозимига тайинлангани, собиқ олий таълим вазири Иномжон Мажидов эса Ўзбекистон Миллий университети ректорлигига тайинлангани ҳақида хабар берилганди.
Изоҳ (0)