JSST dunyo mamlakatlarini davlat muassasalari — maktab, bolalar bog‘chalari, kasalxona va qariyalar uylarida sog‘lom ovqatlanish bilan ta’minlashga chaqirdi, deb xabar bermoqda BMT Yangiliklar markazi.
Tashkilot noto‘g‘ri ovqatlanish organizmga katta zarar yetkazishini, oqibatda saraton, diabet va yurak-qon tomir kasalliklari kabi jiddiy, surunkali kasalliklarga olib kelishi mumkinligini eslatdi.
“Hukumatlarga boshqalar uchun namuna bo‘lish va davlat idoralarida beriladigan yoki sotiladigan ovqatlar sog‘lom bo‘lishi uchun barcha imkoniyatlarni ishga solish payti keldi”, — degan JSST rahbari Tedros Gebreyesus. “Davlat mablag‘lari nosog‘lom oziq-ovqatga sarflanmasligi kerak”, — deya qo‘shimcha qilgan u.
JSST hisob-kitoblariga ko‘ra, ushbu muassasalarda sog‘lom ovqatlanish har yili 8 milliongacha kishilar hayotini saqlab qolishi mumkin.
Mutaxassislar mamlakatlarga jamoat oshxonalarida ovqatlanish menyusini yangilashga yordam beruvchi harakatlar rejasini e’lon qildi. Unda quyidagilarni taklif qilinmoqda:
- tuz iste’molini kamaytirish va oshpazlarning yodlangan tuzdan foydalanganiga ishonch hosil qilish;
- shakar iste’molini kamaytirish;
- to‘yingan yog‘larni o‘z ichiga olgan oziq-ovqat mahsulotlaridan foydalanishni to‘xtatish;
- transyog‘larni ratsiondan butunlay chiqarib tashlash;
- meva, sabzavot, don va dukkakli ekinlar, shuningdek, yong‘oq iste’molini sezilarli darajada oshirish;
- toza ichimlik suvi bilan bepul ta’minlash.
Xususan, Braziliyada yangi qonunlarga binoan maktabda ovqatlanish uchun ajratiladigan mablag‘larning 30 foizi mahalliy fermer xo‘jaliklarining yangi va mavsumiy mahsulotlariga sarflanishi kerak. Shuningdek, maktab menyusida yarimtayyor mahsulotlar bo‘lmasligi kerak.
Janubiy Koreya hukumati maktablardan 200 metr radiusda sog‘lom ovqatlanish zonalarini tashkil etdi. Ushbu zonalardagi restoran va kafelarda shakar, to‘yingan yog‘ yoki kaloriya belgilangan me’yordan ortiq bo‘lgan oziq-ovqat mahsulotlarini sotish taqiqlanadi.
O‘zbekiston Prezidenti 2020-yil 10-noyabr kuni “Aholining sog‘lom ovqatlanishini ta’minlash bo‘yicha qo‘shimcha chora-tadbirlar to‘g‘risida”gi qarorni imzolagandi. Davlat rahbari tibbiyot tizimining kamida 50 foiz ishi aholini to‘g‘ri ovqatlanish va jismoniy tarbiyaga o‘rgatish bo‘lishi lozimligini ta’kidlagan.
Izoh (0)