Janubiy Koreya Oliy sudi sobiq prezident Pak Kin Xe uchun korrupsiya ishi bo‘yicha 20 yillik qamoq jazosini o‘z kuchida qoldirdi, deya xabar bermoqda Renhap agentligiga tayanib “Interfaks”.
Ma’lum qilinishicha, 2020-yilning iyulida sobiq prezidentning qamoq muddati 25 yildan 20 yilga qisqartirildi. Sud majlisi 14-yanvar kuni prokuratura tomonidan iyul qaroriga qarshi shikoyat asosida bo‘lib o‘tdi. Oliy sud hukmni o‘z kuchida qoldirildi.
Sud hukmi yakuniy hisoblanadi. Sud shu tariqa mamlakatdagi eng yirik siyosiy mojarolardan biriga chek qo‘ydi. Sud jarayoni uch yil-u to‘qqiz oy davom etdi. 68 yoshli Park Kin Xe qamoqda o‘tkazgan vaqtni hisobga olgan holda 2039-yil u yerdan ozod qilinadi.
Pak Kin Xe 2017-yilda korrupsiya mojarosiga aloqadorligi sababli hokimiyatdan chetlashtirilgan. U do‘sti Chxve Sun Sil bilan til biriktirib, Samsung va Lotte kabi yirik kompaniyalarni Sun Sil nazorat qilgan ikkita jamg‘armaga 77,4 milliard von ajratishga majbur qilganlikda ayblangan.
Sobiq prezident 2018-yili Milliy razvedka xizmatidan 2,5 milliard vonni noqonuniy olganlikda ham ayblangan.
Eslatib o‘tamiz, Janubiy Koreyaning korrupsiyada ayblangan yana bir sobiq prezidenti Li Myon Bak 17 yilga qamalgan edi.
Izoh (0)