Жанубий Корея Олий суди собиқ президент Пак Кин Хе учун коррупция иши бўйича 20 йиллик қамоқ жазосини ўз кучида қолдирди, дея хабар бермоқда Ренҳап агентлигига таяниб «Интерфакс».
Маълум қилинишича, 2020 йилнинг июлида собиқ президентнинг қамоқ муддати 25 йилдан 20 йилга қисқартирилди. Суд мажлиси 14 январь куни прокуратура томонидан июль қарорига қарши шикоят асосида бўлиб ўтди. Олий суд ҳукмни ўз кучида қолдирилди.
Суд ҳукми якуний ҳисобланади. Суд шу тариқа мамлакатдаги энг йирик сиёсий можаролардан бирига чек қўйди. Суд жараёни уч йил-у тўққиз ой давом этди. 68 ёшли Парк Кин Хе қамоқда ўтказган вақтни ҳисобга олган ҳолда 2039 йил у ердан озод қилинади.
Пак Кин Хе 2017 йилда коррупция можаросига алоқадорлиги сабабли ҳокимиятдан четлаштирилган. У дўсти Чхве Сун Сил билан тил бириктириб, Samsung ва Lotte каби йирик компанияларни Сун Сил назорат қилган иккита жамғармага 77,4 миллиард вон ажратишга мажбур қилганликда айбланган.
Собиқ президент 2018 йили Миллий разведка хизматидан 2,5 миллиард вонни ноқонуний олганликда ҳам айбланган.
Эслатиб ўтамиз, Жанубий Кореянинг коррупцияда айбланган яна бир собиқ президенти Ли Мён Бак 17 йилга қамалган эди.
Изоҳ (0)