Telegram asoschisi Pavel Durov yangi foydalanuvchilar oqimi fonida yana ikki davlat rahbarlari – Braziliya va Turkiya prezidentlari messenjerda o‘zlarining Telegram-kanallarini ishga tushirganini aytdi, deya xabar qilmoqda Meduza.
Bundan tashqari, Meksika, Fransiya, Ukraina, O‘zbekiston, Tayvan prezidentlari, shuningdek, Singapur, Efiopiya va Isroil bosh vazirlari Telegram’dan foydalanadi. Ushbu kanallarning barchasida tasdiqlovchi – verifikatsiya belgisi mavjud.
Durov yanvar oyi boshlarida Telegram auditoriyasi 500 million foydalanuvchiga yetganini aytgan edi.
“Biz insoniyat tarixidagi eng katta raqamli migratsiyani ko‘rishimiz mumkin”, – dedi Durov.
Foydalanuvchilarning Telegram’ga “ko‘chishi”, dunyodagi eng mashhur messenjer – WhatsApp xizmat ko‘rsatish shartlari va maxfiylik siyosatini yangilagani bilan bog‘liq. Bu o‘zgarishlar ko‘plab foydalanuvchilarni norozi qildi va ular boshqa messenjerlarda ro‘yxatdan o‘ta boshladi.
Tramp tarafdorlari tomonidan Kapitoliyga hujum qilingandan so‘ng eng yirik ijtimoiy tarmoqlar, xususan, Facebook, Instagram, Twitter, Snapchat hamda Twitch uning akkauntlarini bloklab qo‘ydi. Shundan keyin Donald Trampning kanali Telegram’da paydo bo‘ldi. Kanalga 500 mingdan ortiq kishi obuna bo‘lgan. Ammo kanal nomi yoniga firibgarlikni anglatuvchi Scam belgisi qo‘yilgan va bu kanal soxta akkaunt ekanligidan ogohlantirilgan.
Avvalroq Pavel Durov foydalanuvchilarni Android foydasiga iOS’dan voz kechishga chaqirgani hamda yangi iPhone 12 Pro’ni “xunuk va eskirgan” deb atagani haqida xabar berilgandi.
Izoh (0)