Poytaxtda Toshkent metropoliteni muzeyi tashkil etiladi. Bu haqda metropolitenning marketing, reklama va jamoatchilik bilan aloqalar bo‘limi boshlig‘i Zarina Mansurova Toshkent shahar hokimligiga bergan intervyusida ma’lum qildi.
“2021-yilda metropoliten muzeyini ochish niyatidamiz. Hozircha uning joyi aniq emas. Lekin “Minor” bekatini rejalashtirganmiz. U metro bekatining vestibyulida joylashadi.
Hozirda muzeyni tashkil qilish va ochish ustida ish ketmoqda. Bu g‘oya o‘tgan yildan beri rivojlanmoqda.
Metropolitenga aloqador bo‘lgan insonlar bizga bog‘lanib, uning nishonlari, belgilari va unga tegishli buyumlari bo‘lsa, biz bilan hamkorlik qilishlarini istardik”, – deydi Zarina Mansurova.
U ushbu buyumlar biron joyda chang bosmasdan muzeyda tursa, odamlar ularni ko‘rsa, metropoliten tarixi bilan tanishsa, xursand bo‘lishini ta’kidlagan.
Avvalroq Toshkent metropolitenidagi poyezdlarning harakatlanish orasidagi vaqt qisqargani hamda Shavkat Mirziyoyev metroni rivojlantirish loyihasini oxirigacha yetkazish topshirig‘ini bergani haqida xabar berilgandi.
Izoh (0)