Bosh vazir o‘rinbosari, Turizmni rivojlantirish davlat qo‘mitasi raisi Aziz Abduhakimov 9-yanvar kuni AOKAda o‘tkazilgan brifingda 2020-yilda turizm sohasida qayd etilgan natijalar va 2021-yildagi vazifalar haqida ma’lumot berdi.
“Koronavirus pandemiyasi tufayli yuz bergan global inqiroz natijasida mamlakatimiz turizmi eng jiddiy zarar ko‘rgan sohalardan biri bo‘ldi. 2020-yilda jami 1 million 504 ming sayyoh tashrif buyurdi. Bunda 261 million dollar miqdorida turizm xizmatini ko‘rsatdik”, — degan u.
Aziz Abduhakimov turizm sohasida 2021-yildagi ustuvor vazifalar haqida ham to‘xtalib o‘tib, “2021-yilda barcha ishlarni umumiy raqamlar orqali emas, aniq rejalar va reysma-reys yo‘nalish bo‘yicha batafsil hisob-kitob asosida amalga oshirmoqchimiz, ziyorat turizmiga ko‘proq e’tibor qaratmoqchimiz”, — deb aytgan. 2021-yilda O‘zbekistonga 1 million 700 ming nafar xorijiy sayyoh tashrifini ta’minlash rejalashtirilganini, buning evaziga turizm xizmatlari eksporti 370 million dollarga yetkazilishini ta’kidlagan.
Turizmni rivojlantirish davlat qo‘mitasi raisi ichki turizm bo‘yicha statistik ma’lumotlarni ham keltirib o‘tgan. Uning so‘zlariga ko‘ra, 2020-yilda mahalliy fuqarolarning 1,8 million nafariga mamlakat ichida sayyohlik tashkil qilingan bo‘lsa, joriy yilda bu ko‘rsatkich keskin oshib, 7,5 million kishiga yetishi kutilmoqda.
Avvalroq Aziz Abduhakimov “Al-Buxoriy” xalqaro sun’iy yo‘ldosh telekanalini ochish va unda musulmon aholisi ko‘p bo‘lgan mamlakatlar tillarida O‘zbekistonning ziyorat turizmi salohiyatini namoyish qilib, targ‘ibot kampaniyasini kuchaytirishni, shuningdek, innovatsion muzey hamda Ziyorat turizmi markazi tashkil qilishni taklif etgandi. Shuningdek, mehmonxonalar faoliyatini jonlantirishi mumkin bo‘lgan ziyorat turizmini rivojlantirishga oid loyihalar ishlab chiqilayotganini ma’lum qilgan.
Izoh (0)