“Toshshahartransxizmat” poytaxtning 8-sonli avtobus yo‘nalishini yopish va 131-sonli avtobus yo‘nalishini qisqartirish to‘g‘risidagi qarorni qayta ko‘rib chiqdi. Kompaniya matbuot xizmatining xabar berishicha, ushbu yo‘nalishlarni yopmaslik, harakatini qisqartirmaslikka qaror qilindi.
11-yanvardan boshlab Sergeli 7-dahasidan Chilonzor 25-dahaga qatnovchi 8-sonli avtobus yo‘nalishini yopish, “Do‘stlik 2-mavzesi—Olimpiya mavzesi” avtobus yo‘nalishini “Do‘stlik 2-mavzesi”dan “Janubiy vokzal” avtoshohbekatigacha qisqartirish rejalashtirilgandi. Ushbu taklif yo‘lovchilarda norozilik uyg‘otdi.
“Yo‘lovchilar tomonidan bildirilgan murojaatlarni inobatga olgan holda hamda ushbu yo‘nalishning faoliyatini yanada chuqur o‘rganib chiqish munosabati bilan, shuningdek, yo‘lovchilar tashishdagi uzilishlarning oldini olish maqsadida 131-sonli yo‘nalish harakati vaqtinchalik o‘zgartirishsiz qoldirilishini ma’lum qilamiz” — deyiladi “Toshshahartransxizmat” xabarida. Shuningdek, 8-sonli yo‘nalish harakati ham vaqtinchalik o‘zgartirishsiz qoldirilishi bildirilgan.
Eslatib o‘tamiz, Toshkent shahridagi avtobus yo‘nalishlari tarmog‘ini maqbullashtirish Vazirlar Mahkamasining 2020-yil 16-martdagi “Toshkent shahar yo‘lovchi transporti tizimini takomillashtirish chora-tadbirlari to‘g‘risida”gi qaroriga asosan amalga oshirilmoqda.
Uning Sergeli metrosi ishga tushirilishi bilan bog‘liq navbatdagi bosqichi doirasida 11-yanvardan boshlab 8 va 132-sonli yo‘nalishlar yopiladi. 132, 80 va 133-sonli yo‘nalishlar harakatlanish trassalari o‘zgartiriladi, 38-yo‘nalish harakati uzaytiriladi.
Avtobus yo‘nalishlarini maqbullashtirish bo‘yicha hamma takliflar ham yo‘lovchilar tomonidan ijobiy qabul qilinmagan.
Avvalroq Toshkentdagi ikki avtobus saroyini viloyatga ko‘chirish rejalashtirilayotgani to‘g‘risida xabar berilgandi.
Izoh (0)