Buxoro viloyatida o‘tkazilgan dron shouda uchirilgan dronlar o‘g‘irlanmagani ma’lum qilindi, deya xabar berdi “Daryo” muxbiri.
Ma’lum bo‘lishicha, 2021-yilning 8-yanvar kuni Buxoro shahridagi Poyi kalon ansamblida dronlar shousi o‘tkazilgan. Shouda osmonga uchirilgan 500 ta dronning bir nechtasi qaytib tushmagan.
Shundan so‘ng viloyat Kadastr agentligi boshqarmasi dronlar shousi ko‘tarinki kayfiyatda o‘tganini aytib, dronlarning yo‘qolganini bildirgan va topishda ko‘mak so‘ragan.
“Respublikamizda ilk dronlar shousi 2020-yil kirib kelishi munosabati bilan Toshkent shahrida o‘tkazildi va unda 250 dona dron uchirildi. Xuddi shuningdek, Navro‘z bayramida ham shunday shouni tashkil etishni mo‘ljallagandik. Biroq pandemiya sababli dronlar shousi qoldirildi. Shu bois 2021-yil boshida aholiga ko‘tarinki kayfiyat bag‘ishlash maqsadida agentlik tashabbusi bilan Samarqandda hamda Buxoroda 500 dona dron yordamida shou o‘tkazdik”, — dedi Kadastr agentligi axborot xizmati bosh mutaxassisi Jur’atbek Aslonov.
Buxoro viloyat Kadastr agentligi boshqarmasi matbuot xizmati bosh mutaxassisi Murodilla Rashidovga ko‘ra, 10 daqiqalik shouda dronlar 100 metr balandlikka uchirilgan va ular yordamida besh xil ko‘rgazma (figura) namoyish qilingan. Biroq, iqlimning noqulay kelgani oqibatida havoga ko‘tarilgan 500 dona dronning bir nechtasi uchirilgan manziliga qayta qo‘nmagan.
“Shu kuni Kadastr boshqarmasi tomonidan ijtimoiy tarmoqlarda davlat mulki hisoblangan dronlarning yo‘qolgani, ulardan faqatgina shou o‘tkazilganda foydalanish mumkinligi, shuningdek, aholidan agar dronlar topilganda, ichki ishlar xodimlariga yetkazib berish borasida e’lon tarqatildi. Mazkur e’lon sabab ko‘plab dronlar mahalla va guzarlardagi ko‘cha hamda uy tomlaridan topildi”, — deydi boshqarma mas’ullari.
Qo‘shimcha ma’lumot berilishicha, 3 ta dron haligacha topilmagan.
“Shou davomida havoga ko‘tarilgan dronlardan hozircha uchtasi topilmadi. Aytish o‘rinliki, dronlar juda nozik texnik vosita sanaladi. Sovuq ob-havo sharoitida uchirilgan dronlarning o‘z manziliga qayta qo‘nishida nosozliklar kuzatilgan bo‘lishi mumkin. Biroq, shuni alohida ta’kidlaymizki, dronlar o‘g‘irlanmagan”, — deydi Murodilla Rashidov.
Izoh (0)