Бош вазир ўринбосари, Туризмни ривожлантириш давлат қўмитаси раиси Азиз Абдуҳакимов 9 январь куни АОКАда ўтказилган брифингда 2020 йилда туризм соҳасида қайд этилган натижалар ва 2021 йилдаги вазифалар ҳақида маълумот берди.
«Коронавирус пандемияси туфайли юз берган глобал инқироз натижасида мамлакатимиз туризми энг жиддий зарар кўрган соҳалардан бири бўлди. 2020 йилда жами 1 миллион 504 минг сайёҳ ташриф буюрди. Бунда 261 миллион доллар миқдорида туризм хизматини кўрсатдик», — деган у.
Азиз Абдуҳакимов туризм соҳасида 2021 йилдаги устувор вазифалар ҳақида ҳам тўхталиб ўтиб, «2021 йилда барча ишларни умумий рақамлар орқали эмас, аниқ режалар ва рейсма-рейс йўналиш бўйича батафсил ҳисоб-китоб асосида амалга оширмоқчимиз, зиёрат туризмига кўпроқ эътибор қаратмоқчимиз», — деб айтган. 2021 йилда Ўзбекистонга 1 миллион 700 минг нафар хорижий сайёҳ ташрифини таъминлаш режалаштирилганини, бунинг эвазига туризм хизматлари экспорти 370 миллион долларга етказилишини таъкидлаган.
Туризмни ривожлантириш давлат қўмитаси раиси ички туризм бўйича статистик маълумотларни ҳам келтириб ўтган. Унинг сўзларига кўра, 2020 йилда маҳаллий фуқароларнинг 1,8 миллион нафарига мамлакат ичида сайёҳлик ташкил қилинган бўлса, жорий йилда бу кўрсаткич кескин ошиб, 7,5 миллион кишига етиши кутилмоқда.
Аввалроқ Азиз Абдуҳакимов «Ал-Бухорий» халқаро сунъий йўлдош телеканалини очиш ва унда мусулмон аҳолиси кўп бўлган мамлакатлар тилларида Ўзбекистоннинг зиёрат туризми салоҳиятини намойиш қилиб, тарғибот кампаниясини кучайтиришни, шунингдек, инновацион музей ҳамда Зиёрат туризми маркази ташкил қилишни таклиф этганди. Шунингдек, меҳмонхоналар фаолиятини жонлантириши мумкин бўлган зиёрат туризмини ривожлантиришга оид лойиҳалар ишлаб чиқилаётганини маълум қилган.
Изоҳ (0)