O‘zbekistonda 11-yanvardan barcha maktablarda o‘quv jarayonlari to‘liq an’anaviy shaklga o‘tkazilishi xabar berilgandi. Bu xabar ijtimoiy tarmoqlarda ko‘plab tushunmovchilik va e’tirozlarga sabab bo‘lgani uchun Xalq ta’limi vazirligi ota-onalarning fikrini inobatga olgan holda ayrim o‘quvchilar uchun onlayn ta’lim davom etishini ma’lum qildi.
Qayd etilishicha, O‘zbekistonda maktablar 2020-yil sentabr oyidan sanitar-epidemiologik talablarga javob bergan holda bosqichma-bosqich faoliyatini tiklagandi. Qishki ta’tildan avval respublika o‘quvchilarining 90 foizi an’anaviy ta’limga qaytdi. Qolgan 10 foiz o‘quvchilarning ham kelajagiga befarq bo‘lmay, ularni ham maktab ta’limiga bevosita qamrab olish maqsad qilingan edi.
Vazirlik xavotirga o‘rin yo‘q ekanligini, uyida kasallik tarqalishiga xavotir katta bo‘lgan, keksa odamlari bor hamda salomatligida surunkali xastaligi bo‘lgan o‘quvchilarning ta’lim olishi uchun parallel ravishda “Onlayn-maktab” loyihasi ham davom ettirilishini ma’lum qildi. Bunday oilalar avvalgi chorakdagidek o‘qishini uyidan davom ettirishiga imkoniyat yaratiladi.
“O‘quvchilar o‘rtasida o‘tkazilgan so‘rovnomalarda ularga karantin davrida o‘qituvchilari va tengdoshlari bilan o‘zaro bevosita muloqot yetishmagani aniqlandi. Maktabga bormayotgan o‘quvchilar esa, afsuski, ana shunday imkoniyatdan mahrum bo‘lib qolmoqda, bola uchun do‘stlari bilan doimiy muloqotda bo‘lish va ular bilan bir jamoa bo‘lib ta’lim olish juda muhim, hech qanday eng zamonaviy texnologiya aynan shu muhitni bola uchun ta’minlab bera olmaydi.
Shu o‘rinda farzandini maktabga yubormaydigan ota-onalardan, ularning vaqtini besamar o‘tkazmasliklari hamda uyda ta’lim olishlari uchun barcha zarur shart-sharoitlarni yaratib, ularni to‘liq nazoratga olishlarini so‘rab qolamiz”, — deyiladi XTV xabarida.
Avvalroq maktablarda vaqtincha o‘tilmayotgan fanlar 3-chorakdan davom etishi haqida xabar berilgandi.
Izoh (0)