Садир Жапаров Қирғизистон президенти сайловида салкам 80 фоиз овоз олди. У уч ой аввал қамоқда ўтирган эди

Қирғизистон президенти сайловида Садир Жапаров ғалаба қозонмоқда. Бу маълумот мамлакат Марказий сайлов комиссияси томонидан келтирилмоқда.

Сайлов участкаларининг 96 фоизидаги бюллетенлар ҳисоб-китоб қилинганида, Жапаров 79,25 фоиз овоз олгани маълум бўлган. Унинг энг яқин таъқибчиси Адахон Мадумаров 7 фоиздан камроқ овоз тўплаган.

Президент сайлови билан бирга мамлакатда бошқарув шаклини ўзгартириш бўйича ҳам референдум ўтказилган. Референдум иштирокчиларининг 80 фоиздан ортиғи президентлик республикаси учун овоз берган.

Қирғизистондаги президент сайлови муддатидан аввал ўтказилди – бу сайловнинг ўтказилиши 2020 йил октябрида, парламент сайловларидаги эҳтимолий қоидабузарликлар сабаб бошланган тартибсизликлар сабаб аввалги давлат раҳбари Сўронбой Жээнбеков истеъфо бергач эълон қилинган эди.

Садир Жапаров октябрдаги тўполонларга қадар тартибсизликлар келтириб чиқаришда айбланиб, 10 йиллик озодликдан маҳрум қилиш жазосини ўтаётган эди. Намойишчилар босими остида у қамоқдан озод қилинди, эртасига эса парламент томонидан бош вазир этиб тайинланди. Жээнбековнинг истеъфосидан кейин эса у президент вазифасини бажарувчига айланган эди.