London meri Sodiq Xon koronavirus infeksiyasining yangi shtammi tarqalishi va kasalxonalarda COVID-19 bilan kasallanganlar sonining ko‘payishi sababli shaharda favqulodda holat e’lon qildi. Bu haqda The Guardian xabar qildi.
Xon Buyuk Britaniya bosh vaziri Boris Jonsondan London meriyasiga kengaytirilgan vakolatlarni berishni, shu jumladan, diniy yig‘ilishlarni taqiqlash va olomon ko‘p bo‘lgan joylarda niqob taqishni buyurishni so‘radi.
Mer shahar aholisini uyda o‘tirishga chaqirdi.
“Agar biz zudlik bilan harakat qilmasak, sog‘liqni saqlash tizimimiz ishdan chiqadi va ko‘plab odamlar o‘ladi”, – dedi Sodiq Xon.
Eslatib o‘tamiz, Buyuk Britaniyada koronavirusning yangi turi aniqlangani, shu tufayli mamlakatning ayrim hududlarida kasallik tarqalish sur’ati tezlashgani haqida 14-dekabr kuni mahalliy Sog‘liqni saqlash vazirligi rahbari Mettyu Xenkok ma’lum qildi. Buyuk Britaniya bosh vaziri Boris Jonsonning so‘zlariga ko‘ra, ushbu turdagi koronavirus avvalgilaridan 70 foizga yuqumliroq, lekin undan xavfli emas.
So‘nggi vaqtlarda koronavirusga chalinish holati ko‘paygani bois Tokioda favqulodda holat, Qozog‘iston hamda Germaniyada koronavirus tufayli cheklovlar kuchaytirildi, Livan va Shotlandiyada esa yana karantin joriy etildi.
Izoh (0)